Actualidade / Artigo As medidas de Greenspan non bastan para superar a recesión Ramón Maceiras- Co seu terceiro recurte das taxas de interese nos tres últimos meses, o presidente da Reserva Federal (Fed), Alan Greenspan, está a actuar mais que nunca para tratar de evitar o debilitamento económico mundial. Tras a decisión do martes, as taxas interbancárias fican situadas no 5%, desde o 5,5%, o nível mais baixo desde que a Fed iniciou a última rolda de endurecementos monetários en 1999. O banco tamén reduciu en meio ponto a taxa de desconto, até o 4,5%. Ademais, nun comunicado que acompañou ao anuncio de rebaixa de taxas, a entidade case prometeu novos recurtes, na sua próxima xuntanza do 15 de maio. Moitos investimentistas, que esperaban un recurte ainda maior, crien que a medida sabe a pouco e chega tarde. As accións subian lixeiramente o martes antes da xuntanza da Fed. Cando o banco central emitiu o comunicado dicendo que rebaixara as taxas meio ponto, en lugar dos tres cuartos de ponto amplamente esperados, comezou o desplome. Na sua xuntanza do martes, a Fed citou por primeira vez a fraxilidade das economias foráneas como unha das suas preocupacións. Neste sentido, distintos analistas destacan que, a diferenza de outros recurtes, o efeito desta redución non será tan importante para Latinoamérica. Por dous factores que diluen, en parte, o efeito positivo da redución do costo da déveda en dolares: a inestabilidade pola que atravesa Arxentina, e o feito de que a rebaixa de 50 pontos básicos estivese descontada. Sen embargo, o recurte de taxas é un respiro para Arxentina neste momento. Cada meio ponto de redución nas taxas de interese estadounidenses representa un alívio duns US$70 millóns na sua déveda. Ademais, México é o país mais beneficiado xa que a rebaixa servirá de apoio ao peso e a unha redución das taxas de interese locais. Brasil, tamén está nun discreto momento económico pero seguirá sentindo a presión polo que pasa en Arxentina. Encanto á situación en EE.UU., Janet Yellen, ex gobernadora da Fed e unha das principais economistas da administración de Clinton salientaba en The Wall Street Journal que "existe un risco significativo de que a situación siga deteriorándose". Se a decisión dependese dela rebaixaria as taxas 75 pontos básicos. "A posibilidade de que os gastos de consumo e investimento caian, debido ás grandes perdas bursátis, é o que poderia provocar un brusco xiro na situación", engade Yellen. A contundente acción da Fed pon de manifesto o inusual aperto no que se atopa. A principal debilidade até a data son os mercados financeiros, e os funcionários da Fed temen tomar algunha medida, por se iso pudese interpretar-se como unha resposta que busca simplesmente respaldar aos mercados. Por outro lado, o colapso das accións ameaza con arrastrar á economia á baixa, un factor que o próprio banco recoñeceu no comunicado no que explicaba a sua decisión: "As persistintes presións sobre as marxes de ganáncias están a restrinxir os gastos de investimento e, a través da caída da riqueza accionarial, o consumo". É mais, resulta pouco probábel que a medida da Fed logre impulsar as vendas de automóbeis e vivendas, os sectores da economia que soen responder primeiro e de maneira mais enérxica ás variacións das taxas de interese. Iso debe-se a que ambos mercados se mantiveron relativamente fortes en meio doutros síntomas de debilidade, grazas, en grande parte, á caída das taxas no mercado real, que comezou o segundo trimestre de 2000 en anticipación ás reducións da Fed. Mentres tanto, as empresas que desfrutaron de altas expectativas de ganáncias durante o auxe económico, están a rebaixar as suas previsións de benefícios. Actualmente, os mercados anticipan que as taxas seguirán caindo para ficar entre o 4% e o e 4,5% en setembro. Alguns economistas pensan que se o gasto dos consumidores finalmente se derruba ante a presión da caída bursátil e un aumento do desemprego, o prezo do diñeiro poderia baixar até o 3%. A diferenza de outras recesións, esta vez non houbo unha época prévia de inflación e os prezos para os consumidores se mantiveron surprendentemente estábeis apesar da rápida medra. E ainda que o alza de taxas da Fed xogou un rol no actual enfriamento, a campaña de 1999 e 2000 do banco central para restrinxir o diñeiro foi unha das mais suaves da sua história. De todos modos, nen sequer un relaxamento excesivo en resposta ao estalo da burbulla bursátil é garantía de éxito. En anteriores desaceleracións, os recurtes da Fed soeron impulsar ao mercado. Tras unha breve recuperación en xaneiro, as accións non deixaron de cair ante os decepcionantes informes de ganáncias. A caída do mercado de accións é espécialmente preocupante nestes momentos, debido a que o seu papel na economia é maior que nunca. En relazón co PIB, é tres veces mais grande que en 1990, e a posesión de accións está moito mais xeneralizada. Iso non seria un problema tan grave se as economias fóra de EE.UU. estivesen a medrar a bon ritmo. Pero iso tampouco non esta acontecendo.
ÚLTIMA REVISIÓN: 23/03/2001 |
