Actualidade Vigo, 21 de xuño de 2002 Toda Galiza foi á folga e saíu á rúa Máis de 300.000 persoas manifestáronse o 20-X en toda Galiza   CIG-Comunicación- cig.prensa@galizacig.com   Os sindicatos convocantes lémbranlle ao Governo que se continúa coas súas medidas e leva a cabo outras que ten anunciado debe saber que a loita sindical e a mobilización social vai seguir con todas as consecuencias. Os sindicatos non van permitir que conquistas que custou moito traballo conseguir lles sexan arrebatadas por unha direita política impresentábel. (Ver reportaxe gráfica manifestación Vigo).   Máis de 300.000 persoas respaldaron o 20 de xuño a convocatoria de folga coa súa participación nas 15 mobilizacións que tiveron lugar ao longo da xeografía galega. As cifras foron: A Coruña (50.000), Ferrol (25.000), Ribeira (3.000), Compostela (20.000), Cee (300), Lugo (15.000), Burela (4.000), Monforte (1.000), Ourense (20.000), Barco de Valdeorras (500), Verín (2.000), Pontevedra (15.000), Vigo (150.000), Lalín (250), Vilagarcía de Arousa (7.000). Esta alta participación cidadán nas mobilizacións evidencia o rexeitamento total da cidadanía galega á política socioeconómica do Governo do PP e a unha reforma do desemprego que foi imposta de costas aos cidadáns deste país. O feito de que a folga fora secundada polo 85% dos traballadores e traballadoras desta comunidade xa evidenciaba o éxito da mesma que se ve reforzado pola participación masiva dos cidadáns nas mobilizacións. O sucedido durante toda a xornada de folga e as propias manifestacións celebradas ao mediodía cuestionan claramente as análises que están a facer e as contas que están a botar os voceiros dos governos de Galiza e de Madrid, que se viron desmentidos pola realidade dos feitos. UGT-Galicia, SN de CCOO de Galicia e CIG consideran que non hai que esquecer o paro, sen precedentes, dos centros de El Corte Inglés en A Coruña e Vigo, Coren, Inditex, Citroën, e dos traballadores dos medios de comunicación desta Comunidade, que se cifra nun 75% en prensa escrita (no día de onte), o 50% na radio e do 95% na televisión. Resulta relevante a participación dos traballadores dos medios de comunicación que constitúe unha verdadeira novidade neste tipo de mobilización. Os secretarios xerais de UGT-Galicia, SN de CCOO de Galicia e CIG valoraron moi positivamente o resultado da folga e agradeceron o amplo apoio recibido de diversas asociacións, organizacións políticas, cargos públicos, comités de empresa e a todos os que fixeron posíbel que esta xornada de folga se convertese nun éxito sen precedentes. Os sindicatos convocantes lémbranlle ao Governo que se continúa coas súas medidas e leva a cabo outras que ten anunciado debe saber que a loita sindical e a mobilización social vai seguir con todas as consecuencias. Os sindicatos non van permitir que conquistas que custou moito traballo conseguir lles sexan arrebatadas por unha direita política impresentábel. UGT-Galicia, SN de CCOO de Galicia, CIG.

Confederación Intersindical Galega www.galizacig.com ÚLTIMA REVISIÓN: 21/06/2002