Actualidade / Artigo Vigo, 14 de marzo de 2003 Faleceu Lois Tobío   Lois Pérez Leira- cig.migracion@galizacig.com   Lois Tobío Fernández.   Lois Tobío Fernández nasceu na vila mariñeira de Viveiro no 1906. Proviña dunha acomodada família que valoraba a formación e a cultura. Naquel ambiente privilexiado no que predominaba o pensamento humanista, o estudante mozo comezaba a descobrir o seu fondo sentir galeguista. Na Compostela de finais dos anos vinte realiza a carreira de avogacia e incorpora-se á actividade intelectual e política. Con outros mozos do seu tempo, funda o Seminário de Estudos Galegos, exercendo o cargo de Direitor da Sección de Estudos Xurídicos e Económicos. Ao rematar a carreira foi nomeado profesor auxiliar de Direito Administrativo. No início do 1930 acada unha beca da Universidade de Compostela para estudar Ciéncias Políticas en Berlin, onde pode observar o avance do nazismo. Ao regresar a Santiago, obtén por oposición a praza de profesor auxiliar de História do Direito Romano. Proclamada a Segunda República o 14 de abril de 1931, fonda-se o Partido Galeguista, do cal é un dos integrantes mais activos. Nese mesmo ano, instala-se en Madrid co obxectivo de doutorar-se. Pouco tempo despóis, gaña unha praza no corpo diplomático da nascente república. Foi nomeado en 1932 segredário da embaixada española en Bulgária. Nese periodo, retorna en várias oportunidades a Galiza para colaborar co seu partido e participa na redacción do Estatuto de Autonomia. Ao iniciar-se a Guerra Civil, asume a representación diplomática da República en Sofia. Retorna a España no 1937, asumindo o cargo de Segredário Xeral do Ministério de Estado. En 1938, incorpora-se ao Exército da República. Coa derrota das forzas populares, segue o camiño do exílio. O seu primeiro destino foi Nova Iorque, onde atopa a Castelao, Luís Soto e Ramón Suárez Picallo. Logo, traslada-se a Cuba e alí se relaciona cos intelectuais cubanos que apoiaran a causa da República española. Posteriormente, marcha a México e traballa unha tempada de profesor no Instituto Hispano-Mexicano. Finalmente, establece-se definitivamente na República Oriental do Uruguai. En Montevideo, desenvolveu unha intensa actividade xornalística e patriótica, destacando-se polas suas colaboracións no semário da esquerda Marcha. Foi un dos concelleiros permanentes de Castelao, e un dos ideólogos na conformación do Concello de Galiza. Participou activamente na Irmandade Galega, no programa de rádio Sempre en Galiza, e no Padroado da Cultura Galega. En 1956, participou xunto a Xesús Canabal e Xoán Martínez Castro no Iº Congreso da Emigración Galega, impulsado polo Concello de Galiza. En 1963, retorna ao estado español, radicando-se en Madrid, onde faleceu antonte 12 de marzo, no seu exílio. Foi, por riba de todo, un home extraordinário, un bo e xeneroso, un auténtico nacionalista de esquerdas. Desde esta páxina, rendemos esta pequena homenaxe á súa memória. Lois Pérez Leira. Confederación Intersindical Galega www.galizacig.com ÚLTIMA REVISIÓN: 14/03/2003