Actualidade Vigo, 19 de maio de 2003 Mobilización no Día das Letras   CIG-Comunicación- cig.prensa@galizacig.com   Perto de mil persoas manifestáronse polas rúas de Compostela no Día das Letras Galegas baixo a consigna “despois de 13 anos perdidos outra política lingüística é posíbel”. O tempo foi adverso, un orballo que debagar se converteu en chuvia teimosa. Nas primeiras filas raparigos e raparigas, que foron os protagonistas da manifestación coa que se quere denunciar a actitude pasiva, neglixente, cando non cómplice coa colonización españolizadora da Xunta de Galiza baixo as cores do PP.   Perto de mil persoas manifestáronse polas rúas de Compostela no Día das Letras Galegas baixo a consigna de: despois de 13 anos perdidos outra política lingüística é posíbel. O tempo foi adverso, un orballo que debagar se converteu en chuvia teimosa. Nas primeiras filas raparigos e raparigas, que foron os protagonistas da manifestación coa que se quere denunciar a actitude pasiva, neglixente, cando non cómplice coa colonización españolizadora da Xunta de Galiza baixo as cores do PP. A manifestación foi convocada pola Mesa de Normalización Lingüística, o Bloque Nacionalista Galego, a Confederación Intersindical Galega e Comisións Obreiras de Galicia, e contou co apoio de numerosas organizacións do ámbito da cultura, ensino, etc. A asistencia neste ano foi cativa, por máis que se procuren argumentos varios para xustificar a baixa participación. É verdade que levamos meses de mobilizacións os fins de semáns e que manter o ritmo non é doado, máxime cando o día 1 e 4 de maio as manifestacións foron masivas. Tampouco se pode negar que a campaña eleitoral ocupa todo o tempo e as inquedanzas imediatas, as páxinas dos xornais. Ademais os meios de comunicación seguen, coma sempre, de costas a todas aquelas reivindicacións que constrúan un país que pense e actúe por el, polo que a convocatoria non tivo ningún eco e divulgación masiva, para alén dunha nota paga nun xornal... pouca cousa. Agora ben, estas limitacións que son certas non debían facernos esquecer os nosos erros ou o que temos que mellorar para os próximos anos. Partindo da base de que a defensa e potenciación da lingua é fundamental non só para manter a nosa identidade nacional, senón mesmo para a defensa dos intereses xerais do país, e que estamos diante dun problema tanto sociolóxico como político, non chega con leis e decretos, axudas publicas, chamamentos á militancia lingüística ou posturas victimistas, compre ademais pular polo debate político sobre o tema e dar canle pública á vontade maioritaria de potenciar o uso do galego. E un dos xeitos de manifestar esa vontade é a mobilización do Día das Letras, outras maneiras poden ser: os correlinguas, recitais, o teatro, etc. Debemos polo tanto aceptar criticamente que este ano non estivemos á altura das circunstancias, non fixemos unha campaña previa axeitada (mesmo mínima) como para divulgar a mobilización, e os resultados non podían ser outros. Mesmo foron dignos e lóxicos tendo en conta o contexto e os nosos erros. Se cadra o vindeiro ano teriamos que facer unha campaña previa con actos en povos e cidades, conseguir unha difusión alternativa aos meios de comunicación de masas en mans dun empresariado anti-galego, así como procurar a participación do maior numero de organizacións na campaña previa e manifestación do Día das Letras Galegas. En todo caso, para alén da reflexión que cada forza faga, o sindicalismo nacionalista acordou potenciar as mobilizacións a prol do noso idioma, e para acadar ese obxectivo todo indica que fai falla máis adicación, mellorar os métodos de traballo e a comunicación co povo.

Confederación Intersindical Galega www.galizacig.com ÚLTIMA REVISIÓN: 19/05/2003 cig.informatica