Actualidade Vigo, 23 de xullo de 2003 Convenio de Aforro Comunicado nº 7   CIG-Comunicación- cig.prensa@galizacig.com A patronal deixa o convenio para setembro Na reunión do día 22 de xullo, a patronal enumerou as materias sobre as que están dispostos a falar, pero sen facer propostas concretas: 1. Revisión salarial Farán unha proposta ao final da negociación. 2. Xornada Non falarán de xornada, horarios, horas extras nin vacacións. 3. Beneficios sociais Están dispostos a falar da mellora das condicións dos préstamos, vinculando esta mellora a unha revisión do límite de endebedamento. Esta medida prexudicaría ao persoal con salarios máis baixos. 4. Emprego Están dispostos a falar de estabilidade e da transformación dos contratos temporais en indefinidos. A cambio, solicitan a ampliación do período de proba dos contratos (período de tempo no que o traballador/a pode ser despedido libremente e sen dereito a indemnización). 5. Xubilacións anticipadas e parciais Ligado ao punto de emprego, solicitan tamén acollerse aos beneficios para as empresas derivados da Lei 35/2002. Os traballadores/as sen cotizacións á Seguridade Social anteriores ao ano 67, non tiñan o dereito á xubilación anticipada, polo que nos casos de prexubilación nas caixas, continuaban en activo ata os 65 anos. Coa modificación proposta, este persoal tería dereito á xubilación anticipada aos 61 anos, cesando a obriga das caixas de cotizar á Seguridade Social e de pagar os complementos de prexubilación. Estes custes serían asumidos agora pola caixa da Seguridade Social. 6. Formación Insisten en limitar a axuda de estudios ás materias relacionadas coa actividade económica das entidades. 7. Varios Estarían dispostos a falar tamén de ciberdereitos, autorizando aos sindicatos para que usen o correo electrónico interno, e estarían dispostos a regular o acoso sexual. Pouco a pouco imos coñecendo as intencións, que non propostas, da ACARL. Teremos que agardar ao 18 de setembro, data da seguinte reunión, para seguir coñecendo as arelas das caixas de aforros. O convenio queda para setembro. Galiza, 22 de xullo de 2003.

Confederación Intersindical Galega www.galizacig.com ÚLTIMA REVISIÓN: 23/07/2003