Actualidade Vigo, 20 de decembro de 2003 Por un convenio galego ¡xa! Manifestación da Federación da Banca da CIG na cidade de Ourense   CIG-Comunicación- cig.prensa@galizacig.com   Ía encabezada a manifestación por unha gran pancarta co lema “Convenio Galego ¡XA! – Eiquí traballamos, eiquí negociamos”. (Ver reportaxe gráfica). A medida que se chegaba ás oficinas bancarias, entraban nelas responsables da federación e manifestantes para explicarlle ao persoal como está actualmente a negociación. (Ver reportaxe gráfica).       O día 19 de decembro, ó redor de 200 delegados e delegadas da CIG do sector financeiro participaron na Manifestación Nacional convocada en Ourense pola Federación de Banca, ante a situación de parálise actual na Mesa de Negociación do convenio colectivo da Banca. A manifestación saíu ás 11 da mañá dende o Parque de San Lázaro, e percorreu as rúas da cidade nas que están establecidas as oficinas principais de distintas entidades bancarias. Ía encabezada a manifestación por unha gran pancarta co lema “Convenio Galego ¡XA! – Eiquí traballamos, eiquí negociamos”. Nesta mobilización, participaron ademais dos responsables da Federación, membros da Executiva Confederal da CIG, así como o secretario comarcal da CIG en Ourense, Etelvino Blanco Rodríguez. Precedeu en todo momento a marcha un cadaleito que contiña no seu interior o convenio colectivo da banca, como un símbolo representativo das pretensións da patronal de enterrar a negociación colectiva e impoñer unilateralmente as condicións de traballo para os seus empregados e empregadas. Durante o percorrido, escoitáronse berros alusivos á situación do convenio, entre os que destacaban “Convenios eiquí e non en Madrid”, “Eiquí traballamos, eiquí negociamos”, “Suba salarial como a patronal”, “Recuperación poder adquisitivo”. A medida que se chegaba ás oficinas bancarias da cidade, entraban nelas responsables da federación acompañados por manifestantes, para explicarlle ao persoal das mesmas como está actualmente a negociación e cales son os obxectivos marcados pola CIG a acadar na mesma, mentres o resto da mobilización quedaba agardando na rúa coreando as consignas. Como xa se anunciaba en mobilizacións anteriores, a Federación de Banca seguirá mobilizándose, e incluso xa anunciou a posibilidade de convocar unha folga no sector se non hai cambios na negociación. Vigo, 19 de decembro de 2003.

Confederación Intersindical Galega www.galizacig.com ÚLTIMA REVISIÓN: 26/01/2004 cig.informatica