Actualidade CIG-Comunicación-
Aínda que unha boa parte eran delegados e delegadas sindicais, foron tamén moitos os traballadores, estudantes e cidadáns de todo tipo que se solidarizaron cos tres traballadores afiliados á CIG, condenados a un total de 14 anos de prisión polo Xulgado do Penal nº2 de Lugo por participar nun piquete informativo na folga xeral do 20 de xuño do ano 2002. O número de concentrados foi de 500 en Lugo e outros tantos en Vigo, 300 en Ourense, e de 200 tanto en A Coruña como en Compostela, e 150 nas cidades de Pontevedra e Ferrol. En total dous mil manifestantes a prol das liberdades, opóndose a unha sentenza inxusta e desproporcionada. Nas concentracións leuse un comunicado, berráronse consignas contra a política represiva do Partido Popular. Esixiuse unha xustiza igual para todos, e que remate a represión contra os movementos sociais, dada ao abeiro do endurecemento do Código Penal e do sector máis conservador da xudicatura. Ao final convocouse aos presentes para que acudan o vindeiro 29 de febreiro á cidade de Lugo para se manifestar a prol dos condenados, esixir xustiza, defender as liberdades. A manifestación do día 29 partirá ás 12 da mañá da Ronda da Muralla, fronte ao edificio dos sindicatos. A continuación, transcribimos o texto do Comunicado da Plataforma para a Defensa das Liberdades que se leu en todas as concentracións:
Unha recente sentenza do Xulgado do Penal nº 2 de Lugo acaba de establecer unha tan dura como inxusta condena a tres traballadores lugueses por participaren nun piquete informativo na pasada Folga Xeral de xuño de 2002. As penas a que foron condenados os traballadores suman preto de 15 anos de cadea e multas superiores ao 11.000 euros. Así mesmo, na devandita sentenza pídese a apertura de dilixencias ás testemuñas, co único "delito" de formaren parte do piquete. Nese sentido, resulta máis que paradoxal que se cualifique como "delito contra os dereitos dos traballadores" -como se fai na sentenza- a actuación normal dun piquete informativo, en exercicio do dereito fundamental de folga. Isto contrasta coa flagrante impunidade con que actúa a patronal galega á hora de impor condicións de traballo abusivas, precarizar o emprego mediante a fraude na contratación, infrinxir a normativa legal sobre seguranza e saúde laboral (136 traballadores/as morreron no noso país en accidentes de traballo no último ano) e mesmo exercendo coaccións para evitar que os traballadores e traballadoras participen na actividade sindical ou secunden folgas. A diversidade de organizacións e colectivos que conformamos a Plataforma EN DEFENSA DAS LIBERDADES entendemos que a devandita sentenza vén a significar un intento de recorte do dereito de folga da clase traballadora e atende máis a criterios políticos que a fundamentos legais. Ademais, esta dáse nun contexto xeral de regresión das liberdades públicas, deterioración das condicións de traballo e acoso aos movementos sociais, que responde aos intereses que representa o Partido Popular e o seu Goberno.
Por último, desde a Plataforma EN DEFENSA DAS LIBERDADES, queremos amosar a nosa solidariedade cos traballadores afectados pola sentenza, no convencemento de que nos feitos polos que se viron xulgados só estaban a exercer un dereito legalmente recoñecido e regulamentado, como é o dereito á folga. Ao mesmo tempo, facemos un chamamento ao conxunto da clase traballadora e á cidadanía da nosa nación en xeral a que fagan público o seu rexeitamento ao recorte de dereitos fundamentais e ao intento de atar e amordazar os movimentos sociais que se opoñen ás políticas reaccionarias do Partido Popular. Facemos un chamamento a participar activamente das mobilizacións convocadas e da manifestación nacional do día 29 do mesmo mes na cidade de Lugo, ás 12 h. na Ronda da Muralla (diante dos locais sindicais).
| ||||||||||||||||||||||||||||||||
 | ||||||||||||||||||||||||||||||||
ÚLTIMA REVISIÓN: 20/02/2004 |
