Actualidade Vigo, 22 de abril de 2004 Mobilizacións en A Coruña polo Convenio de Telemarketing   CIG-Comunicación- cig.prensa@galizacig.com   A entrada da CIG no Comité de Empresa de “Atento” despois das eleccións sindicais celebradas o pasado mes de marzo, permitiu que, por primeira vez, as mobilizacións polo convenio cheguen a Galiza.   O día 20 de abril, cunha concentración diante da empresa “Atento”, a maior empresa do sector de telemarketing na Galiza, comezaron as mobilizacións convocadas pola CIG, CGT, CCOO e UGT, ante o bloqueo nas negociacións do Convenio Colectivo de Telemarketing. Esta mobilización, na que participaron máis de medio cento de representantes sindicais, é unha continuación do proceso de recollida de sinaturas que se está a levar conxuntamente en tódalas empresas do sector. A negociación do Convenio Colectivo está bloqueada ante a falta de propostas da patronal en canto a estabilidade no emprego, carreira profesional, reducción de xornada e suba salarial. Ante esta situación foron convocadas concentracións de delegados/as en todo o estado. A entrada da CIG no Comité de Empresa de “Atento” despois das eleccións sindicais celebradas o pasado mes de marzo, permitiu que, por primeira vez, as mobilizacións polo convenio cheguen a Galiza. O vindeiro día 26 de abril está prevista unha reunión sindical para continuar elaborando o calendario de mobilizacións, entre as que se contempla a convocatoria dunha folga para o vindeiro mes. Galiza, 21 de abril de 2004.

Confederación Intersindical Galega www.galizacig.com ÚLTIMA REVISIÓN: 22/04/2004 cig.informatica