Actualidade CIG-Comunicación-
Surcada por numerosos ríos, as alteracións no caudal e a uniformidade orográfica non permiten o seu aproveitamento enerxético. Os principais recursos naturais son a madeira e o peixe, ambos os dous con problemas de sobre-explotación. Hai xacementos inexplorados de bauxita e fosfatos e indicios serios de depósitos petrolíferos nunha zona en disputa con Senegal. Numerosas etnias, arredor de 30, forman unha comunidade heteroxénea na que os principais grupos son os Balanta (27%), Fula (23%), Mandinga (13%), Manxaca (13%) e Papel (10%). En paralelo á diversidade étnica dáse unha grande diversidade lingüística. O portugués é a língua oficial pero o auténtico idioma franco é o crioulo, fusión de elementos do portugués coas linguas nativas. O 55% da poboación practica relixións animistas, o 40% é musulmán e o 5% restante é cristián. A industria limítase á producción de bens de consumo básicos dirixidos ao mercado interno. As principais actividades están relacionadas coa agroindustria e o sector das bebidas que, xuntas, representan máis da metade da producción industrial. A transformación da madeira, mobiliario, os minerais non metálicos e a metalmecánica están a desenvolverse con rapidez. O comercio caracterízase pola importancia do sector informal, mentres que o turismo é escaso e con moi pouca infraestructura hoteleira. As exportacións pivotan sobre as améndoas, castañas de caxú e camaróns. O inmenso déficit enerxético que ten Guinea-Bissau couta de raiz as posibilidades dun desenvolvemento continuado. Sen fontes enerxéticas próprias, a pouca enerxía producida xérase a partir da leña (agravando a progresiva desertificación) ou do fuel importado para alimentar unha central eléctrica e numerosos xeradores particulares. Con todo, a enerxía xerada é absolutamente insuficiente para atender as necesidades. A producción total de enerxía no ano 2001 foi de 55.000 Mwh, (a producción galega no 2001 acadou os 35 Gwh, é dicer: 636 veces máis). Ese mesmo ano Guinea-Bissau ocupou o posto 196, sobre un total de 210, no ranking mundial de productores de electricidade. É neste contexto no que a CIG e a UNTG van desenvolver o “Proxecto integral de formación, implantación e promoción de enerxías renovables en Guinea-Bissau: PROBISSAU”. O nome completo expresa claramente o contido e obxectivos das actuacións contempladas que se estructuran en catro fases (1 de diagnóstico-determinación-deseño e 3 de execución) a realizar durante este ano e o próximo. A fase II, a desenvolver durante o mes de setembro no centro de formación de FORGA nAs Pontes, consiste na formación intensiva de 8 técnicos en mantemento e montaxe de estructuras de enerxía solar fotovoltaica e térmica. Os alumnos van ser seleccionados en Guinea-Bissau pola UNTG-Uniao Nacional dos Trabalhadores da Guiné, central sindical maioritaria dese País. A fase III, con financiamento maioritario por parte da Xunta de Galicia, costa de tres partes diferenciadas pero interrelacionadas. Nun primeiro lugar os 8 alumnos/as formados na fase II vanse encargar de montar na sede central da UNTG en Bissau un sistema completo (paneis, distribuidores e acumuladores) de enerxía solar fotovoltaica. Este sistema subministrará enerxía suficiente para iluminar e alimentar todos os aparellos eléctricos e electrónicos de uso habitual na sede sindical (ventiladores, fax, impresoras, computadoras). A potencia subministrada polo sistema cubrirá amplamente as necesidades actuais e permitirá atender os incrementos de consumo que se prevén para os próximos anos. A segunda parte desta fase contempla a instalación dun sistema telemático de seguimento da producción enerxética e da enerxía consumida. Unha páxina web -con claves de acceso para a CIG, a UNTG e a Xunta de Galicia– mostrará en tempo real as variables do sistema. Unha webcámara acoplada permitirá un monitoreo máis completo do sistema de control. Simultaneamente, e como terceira parte desta fase,vanse realizar actividades de divulgación das enerxías renovables, dirixidas especialmente a medios de comunicación, institucións oficiais e PEMEs. O proxecto contempla para 1995 a realización dunha cuarta fase na que se procederá a completar o sistema con elementos que permitan a climatización completa do edificio e o subministro de auga quente sanitaria mediante enerxía solar térmica. Ao final do proxecto, a UNTG contará cunhas instalacións que teñan cubertas as necesidades enerxéticas para bastantes anos, con repercusións positivas no traballo sindical. Con este proxecto, a CIG abre unha nova fronte de actividade que vai estar centrada na cooperación solidaria co movemento sindical internacional. | |||||||||
 | |||||||||
ÚLTIMA REVISIÓN: 28/08/2004 |
