|
Actualidade
Vigo, 20 de novembro de 2004
Campaña da Secretaría da Muller
da CIG
25 de novembro: Día Internacional para a Eliminación da Violencia de Xénero
| |
 |
| “Até cando?”, cartaz da campaña
da Secretaría da Muller da CIG contra a violencia de xénero. |
| |
A violencia contra as mulleres atópase
en tódalas esferas da vida e non podemos restrinxila aos malos tratos que se detectan no ámbito do
fogar. É un fenómeno social plasmado nos diferentes ámbitos da vida, nas relacións
sociais, nas relacións laborais, nas relacións persoais, nos medios de comunicación, etc.
A violencia contra as mulleres deriva da desigualdade
de poder entre homes e mulleres, e polo tanto é un instrumento de dominación e control social das
mulleres tolerado socialmente.
A violencia contra as mulleres non é natural,
é aprendida.
A violencia contra as mulleres é un fenómeno
de carácter estrutural e isto conleva exixir medidas para ese cambio estrutural que removan as bases na
que se asenta. Hai que difundir valores e actitudes radicalmente diferentes dende a educación, os medios
de comunicación, etc. Hai que exixir aos poderes públicos, aos axentes socializadores que transmiten
unha ideoloxía patriarcal e que sustentan a subordinación e discriminación das mulleres ese
cambio, que debe ser abordado dende a súa real dimensión e coa suficiente intensidade.
Elvira Patiño Ojea, secretaria nacional
da Secretaría da Muller da CIG.
As vítimas na prensa:
- Sara Alonso asasinada en Vigo.
- Detido un sexaxenario de Noia por presunta violación
da súa neta. La Voz, 8 de novembro de 2004.
- Un vigués condenado a nove anos de cárcere por
abusar da súa filla en 1993. La Voz, 28 de outubro de 2004.
- Un acusado de abusar da súa filla de 11 anos, di que
só a levaba de pubs. La Voz, 29 de outubro de 2004.
- A policía rescata dun piso de Lugo a unha muller que
estaba sendo agredida. La Voz, 28 de outubro de 2004.
- Un condenado por malos tratos ameazas desde A Lama á
súa compañeira. La Voz, 28 de outubro de 2004.
- Detido en Líbano o home que abrasou a súa moza
en Málaga. La Voz, 7 de novembro de 2004.
- O xurado declara culpábel por unanimidade ao home que
violou e asasinou á nena Tamara Navas. La Voz, 7 de novembro de 2004.
- O fiscal pide oito anos de prisión para un xoven por
agresión sexual a unha peregrina. La Voz, 6 de novembro de 2004.
As vítimas segundo dados oficiais:
O Poder Xudicial informou de que en Galiza no ano 2003 houbo
un total de 3.507 denuncias recibidas das que 496 foron retiradas e 3.011 foron tramitadas.
Nos nove primeiros meses deste ano 2004, denunciáronse
en Galiza 1.327 delitos e 939 faltas por malos tratos a mans da parella ou ex parella da vítima. As detencións
por “violencia doméstica” triplicáronse na Galiza durante o primeiro semestre. Foron arrestadas entre
xaneiro e xullo un total de 369 persoas, cifra tres veces superior á rexistrada no mesmo período
do ano anterior.
As medidas que propoñemos:
Mecanismos de prevención:
- Campañas institucionais de concienciación sobre
este problema.
- No ámbito educativo, materias que introduzan á
transversalidade na educación para a igualdade ou prevención de condutas violentas.
- Medidas para rematar coa imaxe sexista das mulleres que difunden
os medios de comunicación.
Recursos de atención unha vez producido
o maltrato:
- Redes eficaces de información e asesoramento ás
mulleres.
- Máis casas de acollida e vivendas tuteladas.
- Programas eficaces de inserción laboral das mulleres
maltratadas.
- Programas de asistencia psicolóxica ás vítimas.
- Programas de asistencia xurídica áxiles para
as vítimas de malos tratos.
- Axudas económicas para as mulleres maltratadas.
|
