Actualidade Vigo, 18 de novembro de 2004 Continúa a campaña da Federación de Banca en defensa das condicións laborais e dos postos de traballo O Carballiño foi escenario dunha nova mobilización da Sección Sindical da CIG no Banco Pastor   CIG-Comunicación- cig.prensa@galizacig.com   Esta mobilización enmárcase nunha campaña posta en marcha pola CIG para denunciar a política de recursos humanos do Banco Pastor dende a chegada do novo conselleiro delegado, Fulgencio Cuellar, procedente do Banco Popular. (Fotos: ©galizacig.com, 16/11/2004).   Representantes sindicais da CIG no Banco Pastor e da Federación de Banca de Ourense concentráronse dende as 12 da mañá do día 16 diante da oficina que o Banco Pastor ten en O Carballiño. A mobilización tivo un gran impacto e seguimento por parte da veciñanza, xa que era día de feira nesta vila ourensá. Esta mobilización enmárcase nunha campaña posta en marcha pola CIG para denunciar a política de recursos humanos da entidade dende a chegada do novo conselleiro delegado, Fulgencio Cuellar, procedente do Banco Popular. Anteriormente e neste mesmo mes houbo concentracións de delegados/as en Ribeira e en Viveiro, nas que a Sección Sindical xa anunciaba novas mobilizacións. A CIG oponse á política de traslados xeneralizados e discriminatorios, á indefinición de categorías profesionais pola que a empresa está a crear discriminacións retributivas entre o cadro de persoal, contra a extensión ilegal da xornada laboral e en xeral denuncian a implantación dunha política laboral baseada no acoso moral aos traballadores/as.

Confederación Intersindical Galega www.galizacig.com ÚLTIMA REVISIÓN: 18/11/2004 cig.informatica