Actualidade Santiago, 13 de novembro de 2004 Foron acompañados por membros do Secretariado da CIG, representantes políticos e de organizacións sociais Os traballadores de Lugo condeados a máis de 13 anos de cárcere por participar nun piquete solicitan o indulto   CIG-Comunicación- cig.prensa@galizacig.com   Suso Seixo interviu diante dos representantes das distintas organizacións que se achegaron a Lugo para dar o seu apoio aos sentenciados e reclamar o seu indulto. Descarga o vídeo. (Formato do vídeo: Windows Media Video [wmv], duración: 4'54'', espacio en disco: 8.193.520 bytes [7,81 Mb]).   Os tres traballadores sentenciados pola Audiencia Provincial de Lugo a máis de 13 anos de cárcere e a multas que, en total, se achegan aos 20.000 euros por participar nun piquete na folga xeral do 20 de xuño de 2002, presentaron, na mañá do venres 12, na Subdelegación do Goberno de Lugo, a petición de indulto. Xunto a eles estaban o secretario xeral da CIG e varios membros do Secretariado Confederal e de organizacións sociais, políticas e sindicais. Ás 12:00 horas desta mañá, José Guillermo Rouco, José Luís Trigo Cruzado e José Méndez Torres, os tres traballadores sentenciados pola Audiencia Provincial de Lugo por un delito contra os dereitos dos traballadores, por atentado aos axentes da autoridade e por maltrato sen causar lesión, a máis de 13 anos de cárcere, presentaron na Subdelegación do Goberno de Lugo a petición de indulto. Para apoiar a súa solicitude asistiron ao acto representantes do Secretariado Confederal da CIG, entre os que estaba o secretario xeral, Suso Seixo, representantes do BNG, de IU, do SLG, da FPG, do mundo da cultura e de organizacións sociais como Esculca, Movemento polos Dereitos Civís e Xustiza e Sociedade. Os traballadores fixeron entrega da petición de indulto e das sinaturas e adhesións de centos de particulares e de numerosas organizacións sociais e colectivos, acompañados por Suso Seixo e polo secretario comarcal da CIG de Lugo, Xosé Ferreiro.   Acompañouse a petición de indulto con centos de sinaturas de particulares e coas manifestacións de adhesión de numerosas organizacións sociais, políticas e sindicais. (Fotos: ©GalizaCIG, 12/11/2004).   Á saída da Subdelegación do Goberno, Seixo informou de que a CIG porá en marcha unha campaña de solidariedade e de divulgación desta sentenza para presionar aos poderes públicos para que se modifique o Código Penal, para conseguir que estes compañeiros non ingresen en prisión e para que se faga xustiza con eles. Na mesma mañá do venres, presentouse unha solicitude no Xulgado do Penal número 2 de Lugo para paralizar o seu ingreso en prisión até que o Goberno decida sobre o indulto. A petición de indulto baséase na propia sentenza, que recoñece que se trata de penas desproporcionadas e anima aos condenados para que recorran aos mecanismos legais previstos para impedir que se efectivice. “Vulnérase o principio de proporcionalidade contemplado expresamente pola Sala Segunda do Tribunal Supremo e polo propio Tribunal Constitucional, que intenta evitar o automatismo da resposta penal até extremos que resulten exaxerados”, sinala Suso Seixo. A CIG xa advertira, cando o PSOE aprobou a reforma do Código Penal, da posibilidade de que se utilizara este mecanismo para reprimir os movementos sociais, un uso que na práctica se comproba que se lle está dando.

Confederación Intersindical Galega www.galizacig.com ÚLTIMA REVISIÓN: 13/11/2004 cig.informatica