Actualidade Santiago, 3 de decembro de 2004 Numerosos delegados concentráronse diante da oficina principal de Carballo A sección sindical da CIG no Banco Pastor continúa coas mobilizacións   CIG-Comunicación- cig.prensa@galizacig.com   A sección sindical da CIG no Banco Pastor continuará coas mobilizacións en todo o país e seguirá denunciando a ilegalidade na que están incorrendo os directivos desta empresa con prácticas como a desregulación de traslados, a prolongación de xornadas e as contratas que fan aos novos traballadores. (Fotos: ©M. Valcárcel 02/12/2004).   Máis de 60 delegados da sección sindical da CIG no Banco Pastor e da Federación de Banca concentráronse na mañá do xoves, día 2 de decembro, diante da oficina principal desta entidade en Carballo. A situación dos traballadores e traballadoras do Banco Pastor segue sendo a mesma que cando comezaron as mobilizacións, é dicir, mantense a actitude de prepotencia por parte das direccións rexionais, sobre todo a do Norte e a do Centro, e as baixas provocadas por problemas psicolóxicos van en aumento. Por iso, a sección sindical da CIG no Banco Pastor continuará coas mobilizacións en todo o país e seguirá denunciando a ilegalidade na que están incorrendo os directivos desta empresa con prácticas como a desregulación de traslados, a prolongación de xornadas e as contratas que fan aos novos traballadores. Para a sección sindical da CIG no Banco Pastor a solución pasa porque os responsábeis desa entidade -con capacidade para decidir- se senten a negociar cos portavoces maioritarios dos traballadores. Xa se celebraron outras concentracións, no que vai de mes, en Ribeira, Viveiro, O Carballiño e Vilagarcía.

Confederación Intersindical Galega www.galizacig.com ÚLTIMA REVISIÓN: 03/12/2004 cig.informatica