|
Actualidade CIG-Comunicación-
Non houbo cambios significativos que motiven a desconvocatoria, e tanto as delegadas sindicais da CIG como a afiliación do sector decidiron continuar con esta xornada de folga reivindicando un Convenio Digno, e denunciando as manobras destes dous sindicatos estatais que racharon a unidade de acción mantida ata este momento, pretendendo vender aos traballadores e traballadoras a cambio de beneficios ocultos outorgados pola patronal. Vista a situación, despois da xornada do día 30, na que se realizará unha concentración ás 12 da mañá na rúa Juan Flórez nº 80 de A Coruña (diante da empresa Atento), a CIG buscará nas asembleas de traballadoras e traballadores novas fórmulas para acadar unha solución ao conflito. A continuación reproducimos o texto do comunicado que a Sección Sindical da CIG repartirá na empresa Atento. Levamos un ano de negociacións para mellorar o Convenio de Telemárketing. Levamos un ano cos salarios conxelados. Un ano de tensións, paros, folgas, protestas... e o convenio continúa sen saír adiante. Pese a todo. Pese aos esforzos d@s traballador@s e dos sindicatos, que actuaron nunha exemplar unidade sindical durante todo este tempo. Hai máis de un mes, os 4 sindicatos con representación na mesa de negociación do convenio (CIG, CGT, CCOO e UGT) chegamos á conclusión de que non podiamos permitir que a patronal continuase prolongando no tempo a nosa desesperación pola sinatura do convenio. As nosas condicións laborais son precarias, pero os nosos salarios... Tod@s necesitamos unha suba salarial. Tod@s estamos esperando coma auga de maio o cobro dos atrasos. E con iso xoga a patronal. Coa nosa precariedade. Saben que canto máis se tarde en asinar o acordo máis precaria será a nosa situación, e aí a chantaxe. Por todo iso, os 4 sindicatos (CIG, CGT, UGT e CCOO) valoramos e decidimos facer 3 xornadas de folga para o mes de decembro (os días 7, 23 e 30), como medio de presión sobre a patronal, que, dado que a única linguaxe que entenden é a dos cartos, si tería a necesidade de sentarse a negociar para desbloquear o conflito. O día 22, ás 10 da mañá, a CIG recibe unha convocatoria para unha mediación da mesa do convenio (sindicatos e patronal) ás 16:30 horas. A esa mesma hora, 10 da mañá, en moitos call-centers, CCOO e UGT están repartindo comunicados desconvocando a folga do 23 (con menos de 24 horas de antelación!!) indicándolle ao persoal que se firmara un acordo coa patronal. Esta información foi utilizada por moitas empresas, notificándoselles a moit@s traballador@s que o convenio estaba asinado. Descoñecemos os INTERESES que puideron levar a CCOO e UGT a difundir esta MENTIRA. Ás 16:30 tivo lugar a xuntanza na sede do SIMA, en Madrid e despois de 3 horas de “cociña” entre CCOO, UGT e a patronal, remata sen acordo. Nese momento, os representantes deses sindicatos declaran reconvocada a folga do día seguinte. Unha vez máis, estes dous sindicatos DECIDIRON, sen contar tan sequera cos/coas seus/súas delegad@s nin afiliad@s, TIRARSE Á PISCINA SEN SABER SE HABÍA AUGA. O día 22, e o 23, xornada de folga, CCOO só fai acto de presenza nas concentracións, despregando unha pancarta propia, e convocando concentracións paralelas tentando así desmarcarse da acción sindical conxunta. O día 23, (durante a propia xornada de folga) a escasas 24 horas do FRACASO ESTREPITOSO dos seus manexos do día anterior, CCOO e UGT publican nas súas webs a desconvocatoria da folga do día 30. A CAMBIO DE QUE?? Tivemos acceso ao texto do preacordo que se estaba a barallar, e sorpréndenos comprobar que hai unha cláusula que concede 8 liberacións para CCOO e 6 liberacións para UGT. CCOO e UGT argumentan para desconvocar que van comezar con un conflito “de longa duración”. É que aínda non se decataron de que levamos 1 ANO DE CONFLITO??? É que non saben que para @s traballador@s isto xa é LONGO dabondo? Nótase ben que en ningún deses sindicatos toman as decisións @s afiliad@s. Que as “grandes decisións” as toman “sindicalistas profesionais” que non saben, ou non lembran, o que é malvivir co noso salario e nas nosas condicións. Que non atenden as chamadas. Que se pode esperar deles? Un ano máis de “negociación”? Un ano máis de traizóns? Un ano máis de espera? Despois do éxito da xornada de folga do xoves 23, sabendo que as empresas sufriron as consecuencias da mesma, e que perderon chamadas arreo polo seu inmobilismo... A CAMBIO DE QUE UNHA DESCONVOCATORIA?? Quen gaña con iso?? DESCONVOCAR A FOLGA SÓ FAVORECE Á PATRONAL!!! Estannos vendendo a tod@s!! Para que paramos o día 7 e o 23?? Para que agora decidan facer un conflito de longa duración?? Dende a CIG cremos que esta situación vén poñer de manifesto que a negociación colectiva de ámbito estatal, dende a perspectiva dos traballador@s galeg@s non é práctica nin resolutiva e evidencia que o camiño é unha negociación na que os verdadeiros protagonistas sexamos os traballador@s galeg@s. A CIG NON SE VENDE O Xoves 30 de decembro concentración ás 12:00 da mañá diante de Atento (Juan Flórez, 80-82, A Coruña). |
|||||||
|
|||||||
|
ÚLTIMA REVISIÓN: 29/12/2004 |
