Actualidade Santiago, 15 de xaneiro de 2005 Xa se perderon 85 postos de traballo ao non substituír aos prexubilados Convocada nova folga en Transportes Arriva para os días 14 e 15 de febreiro   CIG-Comunicación- cig.prensa@galizacig.com   Aspecto da estación de Autobuses de Ferrol durante a pasada folga convocada en Transportes Arriva os días 23 e 24 de decembro. (Fotos: @galizacig.com 23/12/2004).   Os delegados sindicais da Federación de Transportes da CIG convocaron novas mobilizacións, logo de celebrarse unha asemblea de traballadores, para os días 14 e 15 de febreiro polo bloqueo das negociacións coa empresa pola mellora das condicións laborais dos traballadores. Os delegados de UGT, que participaron na asemblea, tamén se sumaron a esta convocatoria. Os traballadores de Arriva demandan a mellora das súas condicións laborais e denuncian a perda de 85 postos de traballo na empresa, ao non substituírse aos traballadores prexubilados e non renovarse os contratos temporais. Apúntase mesmo a posibilidade de que este recorte do cadro de persoal podería supor unha regulación de emprego encuberta. Na vez de realizar novas contratacións, a CIG denuncia que se está recorrendo a subcontratas e a empresas “piratas” que prestan o servizo de transporte escolar con traballadores nunhas condicións laborais lamentábeis. Estas empresas teñen condutores que realizan máis horas das permitidas e non poden disfrutar dos descansos que lles corresponden. Ernesto López, representante da CIG sinala ademais que se se fixese unha inspección de tacógrafos “algúns irían ao cárcere”. A folga irá acompañada dun peche na Dirección Xeral de Transportes, pola súa deixadez de funcións, xa que non intentou frear a situación na que se atopa esta empresa. A Dirección Xeral permite que as empresas concesionarias de servizos que presta a Xunta fagan o que lles peta.

Confederación Intersindical Galega www.galizacig.com ÚLTIMA REVISIÓN: 15/01/2005 cig.informatica