Actualidade Santiago, 26 de febreiro de 2005 A Autoridade Portuaria négase a falar dos graves prexuízos que provocan as obras Os afectados pola construción do Porto Exterior de A Coruña demandan diálogo   CIG-Comunicación- cig.prensa@galizacig.com   O Colectivo de Afectados pola construción do Porto Exterior de A Coruña, organizados en torno á CIG, representa ao 80% dos afectados directos e manifesta que non está disposto a que a Autoridade Portuaria siga realizando clandestinamente reunións por este tema sen contar con eles. (Foto: Simulación das novas instalacións portuarias en Punta Langosteira).   O Colectivo de Afectados pola construción do Porto Exterior de A Coruña representados pola CIG denuncian que a Autoridade Portuaria e o seu presidente se negan a entablar negociacións para abordar os graves prexuízos que a construción do Porto Exterior representa para o colectivo de baixura e os percebeiros. O Colectivo de afectados, organizados en torno á CIG, representa ao 80% dos afectados directos e manifesta que non está disposto a que a Autoridade Portuaria siga realizando clandestinamente reunións por este tema sen contar con eles. Ademais, afirman que tampouco están dispostos a tolerar que nesas reunións clandestinas actúen como representantes seus “persoas que non están outorgadas con poder nin teñen lexitimidade para representarnos”. Tanto os percebeiros como o colectivo de baixura manifestan que nos próximos días, de persistir esta actitude prepotente da Autoridade Portuaria, “definiremos un calendario de actuacións para facer valer os nosos dereitos e para exixir que a Autoridade Portuaria abra paso para indemnizar os graves prexuízos e danos que para o noso colectivo supón a obra do Porto Exterior”.

Confederación Intersindical Galega www.galizacig.com ÚLTIMA REVISIÓN: 26/02/2005 cig.informatica