|
Actualidade / Opinión Rafa Villar-
Esta Comisión de Investigación xa nacera como tal dous anos antes, mais a maioría parlamentaria do Partido Popular optou por impedir o seu normal funcionamento e finalmente por dala por morta e enterrada. De feito, foi unha recente sentenza do Tribunal Constitucional a que reabriu outra volta a Comisión para disgusto do PP e do propio presidente da Xunta, quen tivo o delirio de cualificar de “sucursal de Nunca Máis” a devandita Comisión. Sexa como for, esta Comisión acaba de botar a andar, aínda que con bastante mal pé, como vimos de denunciar desde a plataforma cidadá “Nunca Máis”. En primeiro lugar, porque tal como está montada a Comisión, en canto aos comparecentes, ao formato das comparecencias e ao seu calendario, as súas posíbeis conclusións van estar lonxe dos fins e dos obxectivos dunha auténtica Comisión de investigación, que determinase as causas do accidente-catástrofe, que estabelecese medidas sobre as súas consecuencias, que propuxese actuacións para evitar novos accidentes e que depurase as responsabilidades políticas que aínda haxa que depurar; isto último por pura hixiene democrática.
Resulta máis que incomprensíbel, por exemplo, que non vaia haber ningunha comparecencia por parte dos responsábeis da Administración central, tanto do anterior Goberno do PP como actual Goberno do PSOE. Nin sequera os ministros e exministros das carteiras de Medio Ambiente, Pesca e Fomento van participar dos debates e conclusións da Comisión, nunha crise xestionada case con exclusividade desde as competencias e a responsabilidade do Goberno do Estado. Tampouco será comparecente o exdelegado do Goberno, Arsenio Fernández de Mesa, quen foi un dos elementos chave da nefasta xestión do Goberno central e da interesada visión informativa que se transladaba á sociedade galega do que estaba a acontecer. E o curioso disto, é a coincidencia entre o PP e o PSOE no Parlamento galego por evitaren estas comparecencias, que si se reclamaban desde o outro grupo presente na Cámara, o BNG. Seguindo coas eivas da Comisión, tampouco non se entende que se primasen as opinións políticas de actuais Conselleiros, cunha extensión temporal nas súas intervencións catro veces superior ás doutros comparecentes, por riba das opinións dos técnicos, dos científicos, das xentes do sector, dos ecoloxistas ou da propia plataforma “Nunca Máis”, que se terán que conformar con apenas 10 minutos de exposición e 5 minutos de réplica e contrarréplica a cada grupo parlamentario. E o propio formato das comparecencias, sen quendas pregunta-resposta, senón con intervencións xerais en nada favorece un deseño de contidos da Comisión que a faga minimamente interesante e útil. Así, asistimos a auténticos mitins dos conselleiros, como o de López Veiga ou de Núñez Feijoo, enxalzando a suposta magnífica xestión de Xunta e Goberno central na catástrofe do “Prestige” e esquivando calquera pregunta comprometida das que se lles facían, como se xa comezara a campaña para os comicios galegos e eles estivesen en plena disputa electoral. En fin, que aínda seguen instalados na propaganda e na irresponsabilidade. En espera da comparecencia de “Nunca Máis” que será o vindeiro día 7 de marzo, o único rescatábel da Comisión, por parte dos comparecentes que até o de agora asistiron -de momento, só conselleiros e exconselleiros do PP- son unhas palabras de Xosé Cuíña nas que recoñecía que a el persoalmente lle tivese gustado... ir ás manifestacións de “Nunca Máis”!
|
|||||||||||
|
|||||||||||
|
ÚLTIMA REVISIÓN: 18/02/2005
|
