Actualidade Santiago, 4 de marzo de 2005 Globomedia recoñece que o tratamento á muller en “Los Serrano” foi “inadecuado”   CIG-Comunicación- cig.prensa@galizacig.com   A directora de Comunicacións e Relacións Institucionais de Globomedia, produtora que realiza para Tele 5 a serie “Los Serrano”, vén de remitir unha carta á secretaria da Muller da CIG, Elvira Patiño, na que recoñece que “o tratamento do personaxe de Lola foi inadecuado”.   A directora de Comunicacións e Relacións Institucionais de Globomedia, produtora que realiza para Tele 5 a serie “Los Serrano”, vén de remitir unha carta á secretaria da Muller da CIG, Elvira Patiño, na que recoñece que “o tratamento do personaxe de Lola foi inadecuado”. No seu escrito, Globomedia “lamenta profundamente que as mulleres discapacitadas se sentiran feridas por iso”. Reproducimos, de seguido, a comunicación íntegra de Globomedia traducida ao galego. Madrid, 3 de marzo de 2005. Sra. Dña. Elvira Patiño Ojea Secretaria de la Mujer CIG. Estimada. Vimos o comunicado que a CIG fixo público sobre o acontecido no capítulo da serie de Los Serrano que se emitiu o 23 de febreiro pasado. En primeiro lugar, queremos transmitirlle o respecto que Globomedia ten por calquera persoa e colectivo discapacitado e o coidado co que sempre tratamos aos afectados. A discapacidade, sexa a que sexa, abordámola nas nosas producións e, mesmo, temos integrado laboralmente na nosa compañía a persoas afectadas. Canto ao personaxe esporádico de Lola na serie Los Serrano, unha galega embarazada e con problemas de tendonitis por mor do seu traballo nunha conserveira, queremos manifestar que, en ningún caso, estivo no noso ánimo desprezar ou infravalorar a unha persoa por ser muller, estar embarazada ou por sufrir unha discapacidade. A fronte da produción executiva de Los Serrano traballan dúas mulleres, a directora é unha muller e o cincuenta por cento dos profesionais que escriben os guións desta serie son mulleres e, a pesar de que en fición e máis en clave de comedia se traballa con personaxes que nada teñen que ver coa realidade, recoñecemos que o tratamento do personaxe de Lola foi inadecuado. Lamentamos profundamente que as mulleres discapacitadas se sentiran feridas por iso. Exprésolle o noso máis absoluto respecto cara as mulleres, de calquera comunidade ou nacionalidade, e, por suposto aos colectivos discapacitados. Un saúdo. Fdo: Teresa P. Alfageme. Directora de Comunicación e Relacións Institucionais.

Confederación Intersindical Galega www.galizacig.com ÚLTIMA REVISIÓN: 04/03/2005 cig.informatica