Actualidade / Opinión Santiago, 27 de maio de 2005 DESDE O VENTRE DA BALEA O NON á Constitución europea que se aveciña en Francia   Rafa Villar- CIG-Normalización Lingüística Os partidarios do ‘Non’ en Francia, á marxe dun pequeno sector da ultradereita, están situados todos na esquerda social e política, e as razóns que os moven radican no carácter marcadamente neoliberal do texto, isto é, no intento de “constitucionalizar o neoliberalismo” en Europa.   O que non deixa de ser reconfortante é a coincidencia destas razóns polo ‘Non’ coas esgrimidas polo nacionalismo galego co gallo do referendo que tivo lugar no Estado español no pasado mes de febreiro. Razóns que o nacionalismo galego acrecentaba sinalando o carácter pouco democrático dun Tratado que só recoñecía a existencia de Estados (non de pobos e nacións) e das linguas deses Estados (condenando ao ostracismo a linguas como o galego, só polo simple feito de careceren de estado propio).   A escasos días do referendo do Tratado Constitucional europea en Francia, xa ninguén dubida da vitoria do ‘Non’, nin sequera o propio goberno francés –firme partidario do ‘Si’–, que está sometido a tal desgaste que o propio referendo é á vez unha consulta popular acerca das políticas do goberno dereitista. O ‘Si’ francés, a diferenza do que aconteceu no Estado español, encontrou unha ampla resistencia nun sector importante do Partido Socialista francés, sector que se comprometeu activamente na campaña contra este Tratado Constitucional, pola súa deriva claramente neoliberal. Os partidarios do ‘Non’ en Francia, á marxe dun pequeno sector da ultradereita, están situados todos na esquerda social e política, e as razóns que os moven radican no carácter marcadamente neoliberal do texto, isto é, no intento de “constitucionalizar o neoliberalismo” en Europa. O adelgazamento do sistema público de protección social, a perda de dereitos sociais adquiridos, a ameaza á pervivencia dos servizos públicos como tales, o afondamento nas vías militaristas son as cuestións de fondo que latexan no rexeitamento da chamada Constitución europea polo que parece ser a maioría social no país galo. O que non deixa de ser reconfortante é a coincidencia destas razóns polo ‘Non’ coas esgrimidas polo nacionalismo galego co gallo do referendo que tivo lugar no Estado español no pasado mes de febreiro. Razóns que o nacionalismo galego acrecentaba sinalando o carácter pouco democrático dun Tratado que só recoñecía a existencia de Estados (non de pobos e nacións) e das linguas deses Estados (condenando ao ostracismo a linguas como o galego, só polo simple feito de careceren de estado propio). Tamén noutro país, neste caso Holanda, as cousas non pintan nada ben para os partidarios do ‘Si’, xa que as enquisas prevén unha ampla maioría social contraria ao Tratado Constitucional europeo tal e como está formulado nestes momentos. É probábel que ante isto, ante a crecente masa crítica de cidadás e cidadáns europeos renuentes a aceptar a Construción da Europa á imaxe e semellanza dos intereses do capital, aínda sexa factíbel mudar o escenario debuxado para os vindeiros anos polos estrategas da globalización neoliberal. En todo caso, o ‘Non’ en Francia ou en Holanda é unha pequena xanela de esperanza e ilusión para os que cremos que outra Europa é posíbel e necesaria. Santiago de Compostela, 26 de maio de 2005. Rafa Villar é escritor e responsábel do Departamento de Normalización Lingüística da CIG.

Confederación Intersindical Galega www.galizacig.com ÚLTIMA REVISIÓN: 27/05/2005