Actualidade Santiago, 20 de xuño de 2005 Os problemas son maiores na empresa Arriva Noroeste A FGAMT denuncia que o plan de transporte metropolitano na comarca de A Coruña é propaganda   CIG-Comunicación- cig.prensa@galizacig.com   O actual plan de transporte metropolitano na comarca de A Coruña só é propaganda electoral e que os problemas se multiplican sobre todo na empresa Arriva Noroeste S.L. (Foto: Flota parada de autobuses Arriva durante a pasada folga de decembro de 2004 en Ferrol. @galizacig.com).   A Federación de Alimentación, Mar e Transporte da CIG (FGAMT) denuncia que o actual plan de transporte metropolitano na comarca de A Coruña só é propaganda electoral e que os problemas se multiplican sobre todo na empresa Arriva Noroeste S.L. O secretario comarcal da FGAMT en A Coruña, Ernesto López Rei, denuncia que as paradas son moitas delas inadecuadas e perigosas; que as máquinas non están instaladas ao ritmo que din tanto a empresa como a Dirección Xeral de Transportes, xa que moitas veces é “un auténtico galimatías porque o traballador non ten orde de dar billete -non dispón de nada para dalo- e o usuario quéreo para reclamar logo o desconto”. Ademais, as marquesinas son inexistentes por agora, o que provoca que os condutores non saiban moitas veces que paradas teñen que facer e son os propios usuarios os que acaban por dicirlles onde teñen que parar. Desde a FGAMT subliñan que “a propaganda está ben, pero as mentiras da Dirección Xeral de Transporte e a incompetencia tanto de Arriva como da propia Dirección Xeral son manifestas”.

Confederación Intersindical Galega www.galizacig.com ÚLTIMA REVISIÓN: 20/06/2005 cig.informatica