Actualidade Santiago, 16 de xuño de 2005 Pecháronse nas dependencias da Consellaría de Pesca e fixeron unha pitada Sonora protesta dos afectados polas obras do Porto Exterior de A Coruña   CIG-Comunicación- cig.prensa@galizacig.com   Percebeiros e mariñeiros, coa pitada, querían denunciar o incumprimento dos compromisos adquiridos pola Consellaría de Pesca na defensa de compensacións económicas e alternativas para o sector. (Fotos: ©Andy Pérez 15/06/2005).   O colectivo de afectados polas obras do Porto Exterior de A Coruña protagonizaron, na mañá do mércores 15 de xuño, unha sonora protesta nas dependencias da Consellaría de Pesca, no quinto andar da Casa do Mar. Coa pitada querían denunciar o incumprimento dos compromisos adquiridos por esta administración na defensa de compensacións económicas e alternativas para o sector. Esta concentración-peche é continuidade das mobilizacións que vén realizando este colectivo polas obras que se están levando a cabo para construír o Porto Exterior de A Coruña. “Queremos denunciar os incumprimentos de todas as administracións dos compromisos que adquiriron cos afectados e, nomeadamente, a prepotencia da Autoridade Portuaria”, explica Paulo Carril, secretario comarcal de A Coruña e portavoz do colectivo. Para o colectivo a Consellaría debería encabezar as súas demandas de compensacións económicas por unhas perdas que se van incrementando a medida que avanzan as obras e buscar alternativas para que os afectados podan continuar desenvolvendo a súa actividade. Ademais, exixen que se avale o informe económico realizado polo Grupo de Investigación da Universidade de Santiago -no que están integrados os economistas María do Carme García Negro e Xan Doldán, entre outros-, no que as perdas cífranse nuns 27,6 millóns de euros. A estas peticións realizadas diante da Consellaría engaden a de que Pesca “demande que se paren as voladuras e as obras até que non se dean solucións aos afectados”, sinala Paulo Carril, para quen as promesas dos representantes desta administración non foron máis que “palabrería electoral”. Carril estende as súas críticas tanto ao Goberno central como á Xunta de Galiza, pola absoluta indiferencia coa que tratan ao colectivo. “Demandamos que teñan a mesma preocupación para atender as demandas dos afectados que a que amosaron cando se trataba de pedir o comezo das obras”, afirma.

Confederación Intersindical Galega www.galizacig.com ÚLTIMA REVISIÓN: 16/06/2005 cig.informatica