Actualidade Santiago, 23 de xullo de 2005 A FGAMT demanda do bipartito que non se autorice a segregación das liñas de Arriva   CIG-Comunicación- cig.prensa@galizacig.com   A Federación de Alimentación, Mar e Transporte da comarca de A Coruña vén de anunciar que se dirixirá tanto ao PSOE como ao BNG para que, no que respecta “á desfeita” que pretenden facer as empresas compradoras (MONBUS, AUCASA e AUTOS VÁZQUEZ) e a vendedora (ARRIVA NOROESTE SL) coa mobilidade na Costa da Morte, “non lle autoricen” desde a Dirección Xeral de Transportes tal segregación de liñas. (Foto: Autobús da empresa Monbus circulando pola Avenida de Castrelos en Vigo. ©Fernando Pol).   A FGAMT de A Coruña demanda do novo goberno BNG-PSOE que non se autorice desde a Dirección de Transportes a segregación de liñas de Arriva Noroeste SL polas graves repercusións que terá para os usuarios. A Federación de Alimentación, Mar e Transporte da comarca de A Coruña vén de anunciar que se dirixirá tanto ao PSOE como ao BNG para que, no que respecta “á desfeita” que pretenden facer as empresas compradoras (MONBUS, AUCASA e AUTOS VÁZQUEZ) e a vendedora (ARRIVA NOROESTE SL) coa mobilidade na Costa da Morte, “non lle autoricen” desde a Dirección Xeral de Transportes tal segregación de liñas. A FGAMT entende que iso vai supor, dunha banda un encarecemento do transporte (polos múltiples transbordos que se terán que facer e o pouco aproveitamento que supón a segregación) e, pola outra, un trastorno evidente polo feito de ter que andar subindo e baixando de varios autobuses para os que veñan con destino A Coruña ou Santiago e destinos e orixes intermedios. Ernesto López Rei, secretario comarcal da FGAMT, sinala que a nova administración “debe adoptar outra actitude a respecto do mapa concesional do transporte público de viaxeiros por estrada, xa que a antiga administración caracterizábase por facilitar a especulación e nunca por facilitar e promocionar a mobilidade en transporte público”. López Rei agarda que ese cambio se efectivice e demanda que unha das medidas que se adopte desde a nova administración sexa precisamente impedir que se segregue o actual mapa concesional de Bergantiños e a Costa da Morte, propiciando que, no caso de existir unha venda se faga nun só bloque, utilizando calquera das alternativas (que as hai) dentro do dereito mercantil.

Confederación Intersindical Galega www.galizacig.com ÚLTIMA REVISIÓN: 23/07/2005 cig.informatica