Actualidade Santiago, 21 de xullo de 2005 Adebeda aos traballadores a paga extra e as dietas CIG-Transportes de A Coruña advirte do perigo de desmantelamento de Arriva   CIG-Comunicación- cig.prensa@galizacig.com   Un deterioro do servizo que prestaba Arriva Noroeste prexudicaría a A Coruña e a súa comarca, máis todos os enlaces coa Costa da Morte, Ferrolterra e Lugo. (Foto: Autobús da compañía Arriva estacionado na rúa Eduardo Cabello de Vigo. ©Fernando Pol 02/07/2005).   A sección de Transportes da FGAMT da CIG de A Coruña advirte que logo da millonaria e especulativa operación de venda dunha boa parte de Arriva Noroeste esta segue sen abonar nin a paga extra nin as dietas ao conxunto dos traballadores. A CIG témese que detrás podería haber unha operación de desmantelamento do servizo. Diante das graves repercusións que tería a descomposición da empresa, non só para os traballadores, senón tamén para os usuarios, a sección de Transportes da FGAMT está mantendo reunións con todos os alcaldes dos concellos afectados. Coa operación de venda ante notario, que aínda non foi certificada porque non ten a autorización da Dirección Xeral de Transportes da Xunta de Galiza, o servizo distribuíuse entre as empresas adquirintes: Autos Vázquez, que leva a parte máis importante; Autos Carballo, cun peso menor, e Monbus. Ernesto López Rei, secretario comarcal da FGAMT de A Coruña advirte que diste xeito “non está garantido que se manteñan as liñas” e que “cada empresa xestionará os seus tráficos independentemente das outras empresas”, co que podería ocorrer que “un usuario colla un autobús e teña que baixar dúas e até tres veces até chegar a A Coruña”. Postos de traballo Alén do deterioro das relacións laborais e de que aínda non se abonaron nin as dietas nin as pagas extras, por lei os postos de traballo deberían estar garantidos. Porén, o secretario comarcal da FGAMT sinala que tampouco a este respecto se sabe o que pode acontecer. Un deterioro do servizo que prestaba Arriva Noroeste prexudicaría a A Coruña e a súa comarca, máis todos os enlaces coa Costa da Morte, Ferrolterra e Lugo.

Confederación Intersindical Galega www.galizacig.com ÚLTIMA REVISIÓN: 21/07/2005 cig.informatica