Actualidade Santiago, 22 de xullo de 2005 O sindicato presentará denuncia diante da Inspección de Traballo Solidariedade da CIG coa familia do traballador finado en accidente de traballo nas obras do Porto Exterior   CIG-Comunicación- cig.prensa@galizacig.com   Na obra de construción do Porto Exterior en Punta Langosteira, Paulo Carril denuncia a falta “clamorosa e grave de todo tipo de medidas de seguridade tanto no mar como en terra nos traballos que se están a realizar nesta obra de grande magnitude” e o ritmo frenético das obras, con xornadas por traballador de máis de 12 horas e as precarias condicións de traballo. Ademais, Carril engade que a sinalización é nula e que tampouco existe un plano de prevención dos riscos que esta obra conleva tendo en conta a intensidade e bravura coa que bate o mar nas zonas de traballo. (Foto: Vista aérea de Punta Langosteira. Fonte: SigPac).   O pasado martes 19 de xullo finaba Víctor Manuel Martínez Alvarellos en accidente de traballo na obra de construción do Porto Exterior en Punta Langosteira. Diante deste novo accidente mortal, a CIG de A Coruña manifesta a súa solidariedade coa familia e anuncia a presentación dunha denuncia diante da Inspección de Traballo. A CIG de A Coruña visitou o lugar do accidente o propio 19 de xullo e constatou a falta de medios máis absoluta e o desamparo no que está a familia, á que “non se lle deu ningún tipo de explicación por ningún responsábel da empresa nin de ningunha autoridade pública”, explica Paulo Carril, secretario comarcal da CIG de A Coruña. Nesa visita a CIG tamén puido comprobar e denuncia que “non está operativo ningún servizo serio e urxente de busca do cadáver nin tampouco existe asistencia algunha á familia, presente no lugar todo o tempo”. Ausencia de medidas de seguridade Paulo Carril denuncia a falta “clamorosa e grave de todo tipo de medidas de seguridade tanto no mar como en terra nos traballos que se están a realizar nesta obra de grande magnitude” e o ritmo frenético das obras, con xornadas por traballador de máis de 12 horas e as precarias condicións de traballo. Ademais, Carril engade que a sinalización é nula e que tampouco existe un plano de prevención dos riscos que esta obra conleva tendo en conta a intensidade e bravura coa que bate o mar nas zonas de traballo. Denuncia ante a Inspección de Traballo A CIG de A Coruña anuncia que precederá de inmediato a formular denuncia na Inspección de Traballo por todos estes graves feitos e “imos solicitar a paralización das obras mentres non se tomen as medidas de seguridade oportunas, porque en caso contrario é evidente que os acidentes desgraciadamente continuarán”, explica Carril. A CIG tamén demanda que a Fiscalía actúe de inmediato e xa acordou presentarse como acusación particular na causa que contra os responsábeis deste accidente se abra.

Confederación Intersindical Galega www.galizacig.com ÚLTIMA REVISIÓN: 22/07/2005 cig.informatica