Actualidade Santiago, 9 de agosto de 2005 Medra a taxa de paro, a de activos e temporalidade, segundo a EPA do II trimestre de 2005   CIG-Comunicación- cig.prensa@galizacig.com   A nivel sectorial a evolución foi moi heteroxénea, no sector primario e industrial perdeuse emprego, e tanto na construcción como en servicios medrou a ocupación. (...) Leve medra da ocupación (feminina e temporal) e aumento do número de parados son os feitos mais salientables da mercado laboral galego no segundo trimestre de 2005. (Foto: ©Fernando Pol).   A economía galega é incapaz de absorber os novos activos. Así o constata a Enquisa de Poboación Activa do II trimestre de 2005. Segundo esta, a taxa de activos medrou nun 0,3%, fundamentalmente pola incorporación de mulleres, e a taxa de desemprego pasou dun 14,6% a un 15,2%. Os contratos indefinidos descenderon o 0,15% e a taxa de temporalidade medrou situándose no 34,1%. Ao longo do segundo trimestre do ano 2005 produciuse un leve incremento da poboación activa galega (0,3%), medre aportado unicamente polas mulleres (7.300), xa que entre a poboación masculina o número de activos descendeu (3.000). Esta é a tendencia dos últimos anos: medra a poboación activa feminina, a muller está en maior medida intentando acceder a un posto de traballo, está polo tanto en activo (outra cousa é que finalmente acade dito posto), e descende a masculina. Mentres o descenso da poboación masculina, se debe maioritariamente a unha saída definitiva do mercado laboral (por xubilación, incapacidade ou emigración), a evolución da feminina é moito máis fluctuante, dependendo tanto da situación do mercado como da persoal. Non todos os novos activos atoparon emprego. Neste segundo trimestre medrou o número de ocupados un 0,1%, 1.100 novos traballadores, dos cales 2.900 foron mulleres, entre os homes descendeu o número de ocupados en 1.900. Temos un menor incremento da ocupación que dos activos, polo que estes traballadores pasan a engrosar as listas de desempregados, de feito a taxa de paro medra: no primeiro trimestre deste ano acadaba ó 10,9% dos traballadores galegos, e no segundo subiu ata un 11,1%. As diferencias por sexos tamén son importantes. Entre as mulleres medrou moito máis o número de activas que o de ocupadas, polo que medrou a taxa de paro (dun 14,6% a un 15,2%); entre a poboación masculina a saída de activos foi maior que o descenso dos ocupados, polo que a taxa de paro masculina baixa ate o 7,9%, no primeiro trimestre estaba situada no 8,04%. A nivel sectorial a evolución foi moi heteroxénea, no sector primario e industrial perdeuse emprego, e tanto na construcción como en servicios medrou a ocupación. A distribución dos ocupados por sexo e sectores é como segue:   Total S primario Industria Construción Servizos T1-05 T2-05 T1-05 T2-05 T1-05 T2-05 T1-05 T2-05 T1-05 T2-05 Total 1.112,3 1.113,4 129,1 123,3 218,3 216,5 115,8 121,1 649,2 652,5 Homes 650,8 648,9 69,9 70,0 151,4 152,1 108,5 114,3 321,0 312,6 Mulleres 461,5 464,4 59,2 53,3 66,8 64,5 7,3 6,8 328,2 339,9 Fonte: EPA. INE. Datos en miles. No sector servicios é onde se produce o maior incremento da ocupación, todo feminino, a presencia dos homes neste sector diminúe. A perda de emprego rexístrase no sector primario, que xa se está convertendo nunha constante, e no industrial; a situación do sector industrial era previsible, a pesar do bo comportamento do ano 2004, todo indicaba (peche de Valeo en Ourense, prexubilados en Izar...) que a perda de emprego sería a tendencia no 2005. O recente peche de Unicén en Ferrol, a ameaza que pende sobre Plásticos de Galicia en Vigo... por nomear algunha das máis grandes, fannos temer que a desfeita vai continuar ó longo dó ano. Incremento da temporalidade O emprego que se creou no 2005 foi emprego asalariado fundamentalmente, (nestes momentos o 74,3% dos ocupados en Galicia son asalariados), e temporal; o número de asalariados con contrato indefinido descendeu un 0,15%, mentres os que teñen un contrato temporal aumentaron nun 7,6%. Co que a taxa de temporalidade medrou preto de 2 puntos, situándose no 34,1%. Leve medra da ocupación (feminina e temporal) e aumento do número de parados son os feitos mais salientables da mercado laboral galego no segundo trimestre de 2005. Gabinete Técnico de Comunicación. Natividade López Gromaz.

Confederación Intersindical Galega www.galizacig.com ÚLTIMA REVISIÓN: 09/08/2005 cig.informatica