|
Actualidade CIG-Comunicación-
Os dous traballadores despedidos de Arriva SA comezarán unha folga de fame o mércores día 5 de outubro ás 11 da mañá, un nunha caravana na Estación de Autobuses de Ferrol e outra en A Coruña. O acordo adoptouse por unanimidade na asemblea celebrada polos delegados das catro organizacións sindicais con representación na empresa. Os representantes dos traballadores de Arriva acordaron tamén realizar peches e concentracións nas Consellarías de Traballo e na Dirección Xeral de Transportes, que depende da Consellaría de Ordenación do Territorio, e o reparto de panfletos para manter informados aos usuarios e dar a coñecer estas medidas. Segundo Xesús María Pastoriza, responsábel da sección de Transporte da FGMAT-CIG, “a empresa mantén unha actitude realmente irresponsábel porque é a primeira vez que se convoca unha folga e a empresa se nega a ter unha mesa negociadora”. Pastoriza entende que a empresa está xogando a presentar publicamente a imaxe de que “si quere negociar, pero pon dúas condicións que sabe que son inasumíbeis para os traballadores: unha que se levante a folga e outra que se renuncie a demandar a readmisión dos dous despedidos”. Os tres traballadores -un deles chegou a un acordo económico coa empresa- foron despedidos o día 13 de agosto de 2005. As mobilizacións comezaron o día 12 de setembro con folga intermitente, a primeira semana dous días (12 e 13 de setembro), na seguinte tres días (21, 22 e 23 de setembro), na seguinte catro (27, 28, 29 e 30) e desde o 3 de outubro indefinida. En todas estas xornadas de folga a participación dos traballadores foi do 100%, agás os servizos mínimos, que funcionaron con normalidade. As organizacións sindicais convocantes agardan unha reacción por parte da empresa, pero sobre todo por parte da Administración, para que desde a Dirección Xeral de Transportes -que é a dona das liñas- se medie no conflito. “Non pode permitir a unha empresa (Transportes) abocar esta situación a unha folga sen solución, sen posibilidades de saída e de rendición absoluta da outra parte, que é o que busca Arriva”, explica Pastoriza. O representante da CIG considera que a pretensión de Arriva é sentarse a negociar cando os traballadores non aturen máis a situación e, entre mentres, están durante dous, tres, catro ou cinco meses os usuarios sen servizo e iso non lle importa”. Pastoriza matiza que por parte dos traballadores houbo sempre disposición a un diálogo sen impor condicións previas e que están á espera de que se lles diga día, lugar e hora para saber onde ten que ser esa xuntanza. A folga afecta ás liñas de A Coruña, Ferrol, Lugo, Santiago, Costa da Morte, Ribeira e Ourense capital. |
||||||||||||||||||
Informacións relacionadas
|
||||||||||||||||||
|
||||||||||||||||||
|
ÚLTIMA REVISIÓN: 03/10/2005 |
