Actualidade Santiago, 22 de novembro de 2005 A empresa non amosou interese algún por sentarse a negociar Os traballadores pechados na Oficina Principal de Correos de Santiago denuncian presións da dirección   CIG-Comunicación- cig.prensa@galizacig.com   Os traballadores pechados lembran que eles están actuando de forma absolutamente pacífica e que non están perturbando, co peche, ningún dos servizos de Correos que se realizan na oficina. Alén diso, salientan a comprensión amosada polos usuarios e o apoio recibido polos compañeiros, que están chamando desde todos os puntos de Galiza para animalos a continuar co peche. Do mesmo xeito, agradecen as visitas institucionais e de representantes da CIG e o apoio recibido polos delegados deste sindicato, que se concentraron diante da entidade para amosar a súa solidariedade. (Fotos: ©galizacig.com 15/11/2005).   Transcorrida unha semana logo de que se iniciara o peche de traballadores de Correos en demanda de melloras nas condicións laborais dos carteiros rurais, os traballadores pechados denuncian as medidas de presión adoptadas desde a dirección da entidade e a súa nula intención de negociar. Os traballadores de Correos pechados na Oficina Principal de Santiago denuncian as medidas de presión aplicadas pola dirección de Correos que, lonxe de tratar de acabar co conflito pola vía da negociación, pretende empregar mecanismos pouco éticos para provocar que remate o peche. Diste xeito, denuncian que para utilizar o baño, tanto os compañeiros como as compañeiras pechadas, teñen que ir acompañados, até a porta, por un garda de seguridade. Só se lles permitiron usar as duchas no fin de semana, tamén acompañados até a porta polos gardas de seguridade, e desde o sábado ás 14:00 horas intentaron impedir que lles proporcionaran comida, aínda que finalmente conseguírona á noite do sábado e do domingo. Ademais, quedan sen calefacción polas noites e desde Correos non enviaron sequera unha visita do servizo médico da propia entidade. Os traballadores pechados lembran que fronte esta actitude eles están actuando de forma absolutamente pacífica e que non están perturbando, co peche, ningún dos servizos de Correos que se realizan nesa oficina. Alén diso, salientan a comprensión amosada polos usuarios e o apoio recibido polos compañeiros, que están chamando desde todos os puntos de Galiza para animalos a continuar co peche. Do mesmo xeito, agradecen as visitas institucionais e de representantes da CIG e o apoio recibido polos delegados deste sindicato, que se concentraron diante da entidade para amosar a súa solidariedade. Desde a sección de Correos da CIG lembran que as súas demandas son de xustiza e que con este peche o que pretenden é que desde a dirección os escoiten e senten a negociar. Así, reiteran que cobran 19 céntimos por quilómetro realizado, segundo quedou acordado no convenio asinado a finais de 2003. Un convenio, que no propio texto recollía que era improrrogábel e que foi prorrogado de forma irregular sen sufrir revisión algunha, malia a CIG demandar que se estabelecera un sistema periódico de revisión destes conceptos, que non foi aceptado. O incremento dos prezos dos carburantes ten empeorado as condicións salariais dos carteiros rurais, que xa no ano 2004 remitiron numerosos escritos á dirección da empresa en demanda de que se procedera a unha urxente revisión das súas remuneracións. Porén, malia as mobilizacións realizadas até o de agora, desde a dirección de Correos continúa o mutismo. Por iso, continuarán co peche e anuncian novas convocatorias de folga para tratar de mudar esta precaria situación.

Informacións relacionadas 16/11/2005 Concentración de delegados da CIG diante da Oficina Principal de Correos en apoio aos carteiros pechados 15/11/2005 Peche de delegados/as de Correos da CIG na Oficina Principal de Santiago 01/11/2005 Na comarca de Santiago chegou ao 93% Ampla repercusión da folga de Correos convocada pola CIG coa participación dun 87% dos carteiros rurais 30/10/2005 Convocada folga en Correos para o día 31 de outubro 13/10/2005 Será a primeira dun calendario de mobilizacións que a CIG convoca en solitario cos traballadores Folga en Correos de carteiros rurais o 31 de outubro 19/09/2005 Comezarían folgas de varios días a partir de outubro se non se actualizan os suplidos por aportación de vehículos CIG-Correos anuncia mobilizacións se non se atenden as súas demandas

Confederación Intersindical Galega www.galizacig.com ÚLTIMA REVISIÓN: 22/11/2005 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta