|
Actualidade
Santiago, 30 de novembro de 2005
Levántase o peche na Oficina Principal
de Correos de Santiago
Rematan os dous días de folga de carteiros rurais pero non as mobilizacións
| |
 |
| Descarga
o vídeo. (Formato do vídeo: Windows Media Video [wmv], duración: 4'42'',
espazo en disco: 24.447.284 bytes [23,3 Mb]). Realización: César Caramés. |
| |
Un 80% dos carteiros rurais secundaron a folga
convocada pola CIG, os días 28 e 29 de novembro, en demanda de melloras nas súas condicións
sociolaborais. Na segunda xornada de folga, os carteiros sumáronse á concentración que tivo
lugar diante da Oficina Principal de Compostela. Unha concentración coa que se poñía fin a
16 días de peche.
As dúas xornadas de folga convocadas pola
CIG, secundadas polo 80% dos carteiros rurais, remataban co anuncio de novas mobilizacións e accións
dirixidas a presionar á dirección de Correos para que dea solución ás demandas dos
traballadores. O propio Xosé Blanco, secretario nacional de CIG-Correos, na súa intervención
ao remate da concentración resumía esas demandas en “igualdade de condicións dos traballadores
do rural co resto dos traballadores de Correos”.
E é que esa igualdade non existe, non canto
a condicións económicas nin canto a prestacións de servizo por parte dos usuarios das zonas
rurais, que só reciben a correspondencia tres días á semana.
Os carteiros rurais denuncian que os incrementos
do custo dos carburantes, seguros e mantemento de vehículos non estivo compensada cunha actualización
dos suplidos que a empresa abona aos seus traballadores, o que supón para os traballadores afectados unha
merma do seu poder adquisitivo que vai do 10% ao 20% en función dos quilómetros que teñan
que percorrer en cada zona de reparto. En Galiza, esta situación afecta a preto de 1.200 traballadores.
Entre as próximas actuacións a levar
a cabo, Blanco anunciou o envío da mesma carta que se remitiu ao presidente de Correos e Telégrafos
aos grupos parlamentarios, tanto do Parlamento de Galiza como do Congreso dos Deputados. Ademais, lembrou que están
convocadas novas xornadas de folga para os días 2, 3, 4, 5 e 7 de xaneiro de 2006.
|
