|
Actualidade CIG-Comunicación-
O secretario nacional de CIG-Ensino, Anxo Louzao, destacou a precariedade deste colectivo concretada na inestabilidade laboral permanente. Así o amosa que curso tras curso haxa profesorado que queda sen traballar. Subliñou que a situación actual deste colectivo caracterízase tamén pola discriminación laboral, administrativa e retributiva con relación ao profesorado funcionario de carreira. A súa situación laboral inclúe profesorado que traballa con contratos a tempo parcial; hai 533 profesores/as que teñen que impartir unha materia afín (materia da que non son especialistas) e 80 profesores que teñen que impartir dúas materias afíns; 34 que imparten docencia en centros de diferentes localidades; cada curso escolar teñen que cambiar de destino; son os últimos en elixir horarios; os contratos non duran toda a baixa do/a titular da praza; prohibición nuns casos e noutros restrición de acceso ás actividades de formación; imposibilidade de acceder a cargos directivos; non se lles recoñecen os servizos prestados como interinos a todos os efectos; non poden acceder ás axudas do Fondo de Acción Social para adquisición de vivenda; non perciben os sexenios nin os trienios, etc. O secretario nacional de CIG-Ensino denunciou a actitude do anterior goberno por negarse a abrir calquera vía de negociación, o que conlevou que a CIG-Ensino tivera que xudicializar con resultados positivos determinados aspectos como o dereito a cobrar a parte proporcional ao tempo traballado das vacacións e o cobro do complemento específico que o posto de traballo tiña asignado. Destacou Anxo Louzao que a CIG-Ensino agarda que esta situación se resolva satisfactoriamente nas inmediatas negociacións que a Consellaría se comprometeu a iniciar a finais de xaneiro ou a comezos de febreiro. Para iso é necesario acadar un acordo de estabilidade para todo o profesorado que teña prestados servizos á Administración educativa durante un ano, diminuír o número de profesorado interino facilitando o seu acceso á función pública docente, conseguir mellores condicións laborais, administrativas e retributivas que conleven o cobro de sexenios e trienios ou cantidade equivalente, dereito á formación continua, dereito a cobrar os meses de verán con 5 meses traballados e mellora na elaboración e xestión das listas de interinos e substitutos. Alén diso, sinalou Louzao a necesidade de vincular a oferta de emprego público para este ano coa negociación pola estabilidade dos interinos. |
|||||||||
|
|||||||||
|
ÚLTIMA REVISIÓN: 30/01/2006 |
|||||||||
|
