Actualidade Santiago, 5 de xaneiro de 2006 Demandan condicións salariais dignas e horarios racionais Convocada folga de ambulancias para os días 18, 19 e 20 de xaneiro   CIG-Comunicación- cig.prensa@galizacig.com   Neste momento, os traballadores están realizando xornadas de garda de 12 e 24 horas continuadas, o que atenta contra a seguridade tanto dos traballadores como dos propios doentes. (Foto: Ambulacias de servizo na Avenida de Madrid, en Vigo. ©Fernando Pol).   O sector de ambulancias vén de convocar tres xornadas de folga para os días 18, 19 e 20 de xaneiro para presionar á patronal para que senten a negociar o convenio galego. Os traballadores demandan que remate a precariedade laboral que padecen, con salarios miserentos e xornadas maratonianas. En febreiro de 2005 comezouse a negociar un convenio galego no sector das ambulancias. “A patronal bloqueouno sistematicamente, dicindo que eles son concesionarios públicos e que as concesións non lles dan cartos e que mentres a Administración non mellore as condicións eles non van soltar nin un euro”, explica Ernesto Rei, representante do sector de Transportes da FGAMT (CIG). Para Rei, a xustificación argüida pola patronal é insostíbel porque son os empresarios do sector os que aceptan as condicións económicas ofertadas pola Administración e quen manteñen aos traballadores en condicións infames. “Métense nun negocio que saben que non lles dá cartos pero aínda así aceptan a cambio de pagar salarios indignos aos traballadores, para obter, porriba de todo beneficios. A Administración, en todo caso, ten responsabilidade inspectora”. Partindo desa base solicitáronse reunións bipartitas coa Administración, pero esta non aceptou participar. Por iso, a principios de decembro comezáronse a planificar accións para presionar na Mesa. Entre as medidas previstas están: 1. Solicitar o rescate das concesións, daquelas empresas que teñen actas de infracción por parte da Inspección de Traballo. Algo que xa se fixo, no acto de protesta celebrado o pasado 29 de decembro diante da Consellaría de Sanidade. 2. Denunciar a todas as empresas de Galiza á Inspección de Traballo por incumprimentos de carácter xeneralizado (fundamentalmente de saúde laboral e xornada). 3. Folga para os días 18, 19 e 20 de xaneiro, para obrigar á patronal a que negocie as melloras salariais demandadas polos traballadores e a racionalización das xornadas. Neste momento, os traballadores están realizando xornadas de garda de 12 e 24 horas continuadas, o que atenta contra a seguridade tanto dos traballadores como dos propios doentes.

Confederación Intersindical Galega www.galizacig.com ÚLTIMA REVISIÓN: 05/01/2006 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta