|
Actualidade CIG-Comunicación-
A Executiva Confederal da CIG en pleno, secretarios nacionais de federacións, secretarios comarcais e delegadas/os sindicais concentráronse diante da Casa do Concello de Dozón para amosar a súa solidariedade coa delegada sindical da CIG no Concello de Dozón, Ana Lois Navaza, e coas afiliadas e afiliados que traballan no Concello. No acto fíxose entrega dun escrito no Rexistro do Concello no que Ana Lois Navaza, María José Caseiro, José Areán e Carmen Diéguez -todas traballadoras do Concello- explican as condicións laborais que padecen e solicitan o cese das actuacións denunciadas demandando “de non ser atendido o presente requirimento no prazo legalmente estabelecido, se indemnice a cada un dos suscribintes á cantidade simbólica de dez euros por cada día que pase sen que cese a actuación denunciada”. Esta concentración e a campaña que a CIG pon en marcha, vén provocada pola decisión da mutua FREMAP de dar unha alta indebida a Ana Lois Navaza, obrigándoa a reincorporarse no posto de traballo, malia os médicos especificar que non pode regresar porque son precisamente as circunstancias nas que se desenvolve o traballo as que teñen provocado que a delegada sindical da CIG no Concello de Dozón estea a tratamento por depresión. Xosé Carlos Crespo, secretario nacional de CIG-Administración explicou a situación que padecen tanto Ana Lois Navaza como as compañeiras e compañeiros que traballan no Concello e que están afiliados á CIG: retrasos no pagamento de salarios, apertura de expedientes a traballadoras e traballadores, separación do posto de traballo sen encomenda de funcións, ubicación en locais sen as mínimas condicións, illados, sen calefacción, sen acceso ao teléfono, con modificación arbitraria de horarios e condicións de traballo, reducións de salarios a determinadas persoas... Diante deste panorama, Crespo advertiu que “non podemos consentir que continúen estas actitudes contra as nosas compañeiras e compañeiros, polo que seguiremos mobilizándonos e emprendendo todas as accións necesarias até que se amañe esta situación”.
Neste sentido, o secretario xeral da CIG, Suso Seixo, explicou que as demandas da central sindical son “que se faga xustiza, que se respecten os dereitos das traballadoras e traballadores, que se lles restitúa no seu posto de traballo, que se inhabilite ao alcalde de Dozón e que a poder ser vaia a parar á cadea por moitos anos”. O secretario xeral da CIG lembrou as xestións que a central sindical vén realizando para resolver este tema. A primeira, unha entrevista de membros da Executiva Confederal con responsábeis de FREMAP, na que anunciaron á mutua a intención da CIG de iniciar mobilizacións na súa contra se esta non revisa a alta indebida a Ana Lois Navaza. Houbo tamén unha entrevista co xefe da Inspección de Traballo, para que se adopten medidas rigorosas para que se cumpra a normativa en materia de prevención. Neste sentido, Seixo denunciou que as inspeccións de traballo non atenden estes temas e que se se tiveran adoptado medidas preventivas, Ana Lois Navaza non estaría hoxe traballando. Seixo adiantou que a CIG celebrará tamén esta semana unha entrevista co fiscal xefe do Tribunal Superior de Xustiza de Galiza para que actúe, xa que a Fiscalía de Pontevedra viu pedindo de forma reiterada o sobresemento de todas as sentenzas que hai. Ana Lois Navaza e os seus compañeiros acumulan máis de 30 sentenzas favorábeis contra o alcalde polas súas actuacións irregulares e caciquís. |
||||||||||||||||||||||||||||||||||||
|
|
||||||||||||||||||||||||||||||||||||
|
No escrito presentado no Rexistro do Concello, as traballadoras e o traballador afectados polas actuacións irregulares do alcalde, Adolfo Campos, describen as condicións nas que se desenvolve diariamente o seu traballo. No caso de Ana Lois Navaza recóllese que “A sra. Navaza ten asignado o seu lugar de traballo nun habitáculo separado das oficinas xerais do Concello, ao que non ten aceso o público, sen teléfono, sen ordenador nin outros instrumentos de traballo, con calefacción insuficiente, tendo totalmente prohibido, por orde expresa desa Alcaldía o acceso ao fax, á fotocopiadora, ao teléfono e mesmo ás propias oficinas xerais, así como a documentación, expedientes que se tramitan no Concello, tamén ten prohibido atender chamadas. Mesmo se alguén a chama por teléfono non lle permiten atender a chamada. Non se lle asigna, nin se lle permite a realización de ningún traballo, a pesar de telo solicitado reiteradamente. Tampouco se lle permite o acceso a ningunha outra dependencia do Concello, agás os servizos, incumprindo a normativa recollida na Lei de Órganos de Representación dos Funcionario Públicos. Esta situación é a mesma desde hai varios anos e venlle ocasionando un desequilibrio psíquico que lle vén afectando á súa integridade moral e mesmo física, xa que supón un clarísimo menoscabo da súa saúde”. |
||||||||||||||||||||||||||||||||||||
Informacións relacionadas
|
||||||||||||||||||||||||||||||||||||
|
||||||||||||||||||||||||||||||||||||
|
ÚLTIMA REVISIÓN: 31/01/2006 |
||||||||||||||||||||||||||||||||||||
|
