Actualidade Santiago, 26 de xaneiro de 2006 No período 1998-2005 tan só recibiu 64 dos 200 millóns que lle correspondían Galiza discriminada no reparto de fondos mineiros   CIG-Comunicación- cig.prensa@galizacig.com   Non é primeira vez que Galiza se ve discriminada no reparto de fondos mineiros. A Federación de Químicas e Enerxía da CIG xa denunciara no reparto dos fondos do Plan 1998-2005 que dos 200 millóns de euros que nos correspondían só se concederon finalmente 64. (Foto: Mina de lignito a ceo aberto de As Pontes, cuio peche está previsto para decembro de 2007. A partir desta data e nun prazo de cinco anos, o oco se convertirá no Lago de As Pontes: oitocentas hectáreas de lámina de auga e unha profundidade máxima de douscentos metros que contará con dúas illas).   O reparto de fondos mineiros acordado polo Ministerio de Industria xunto cos sindicatos CCOO e UGT beneficia claramente a Asturias, que recibe parte dos que lle corresponderían a Galiza. A Federación de Químicas e Enerxía da CIG explica que esta non é a primeira vez que se discrimina a Galiza. No reparto de fondos do anterior Plan (1998-2005) Galiza só recibiu 64 dos 200 millóns de euros que lle correspondían. Os criterios para o reparto por comunidades autónomas dos fondos de reactivación do plan mineiro 2006-2012 beneficiarán a Asturias, que podería recibir entre un 55 e un 60% dos 2.880 millóns de euros que o Goberno destinará nos próximos seis anos para novas infraestruturas, proxectos empresariais xeradores de emprego e axudas á formación. A maior porcentaxe de fondos a recibir por Asturias sairía dos que lles corresponderían a Galiza. Esta non é primeira vez que Galiza se ve discriminada no reparto de fondos mineiros. A Federación de Químicas e Enerxía da CIG xa denunciara no reparto dos fondos do Plan 1998-2005 que dos 200 millóns de euros que nos correspondían só se concederon finalmente 64, unha redución recoñecida polo propio Ministerio de Industria. Papel dos sindicatos estatais A Federación de Químicas e Enerxía tamén indica que CCOO e UGT nunca permitiron á CIG participar na Mesa do Carbón e que as sucursais destes sindicatos en Galiza nunca demandaron que se tivera máis en conta ao país nas decisións que tomaban os seus homónimos de Madrid. Apoio ao conselleiro de Industria Esta discriminación foi denunciada polo conselleiro de Industria, o nacionalista Fernando Blanco, quen demanda que se rectifiquen as cantidades destinadas a Galiza no reparto de fondos. A CIG saúda a súa determinación e propón que a esa cantidade se engadan os 140 millóns de euros pendentes do plan anterior, para que se restitúa a legalidade. Ademais, desde a Federación de Químicas e Enerxía considérase moi importante que as actuacións que se leven a cabo desde a Consellaría a respecto deste tema se fagan en común e que se poña a funcionar, de contado, a Mesa Galega do Carbón.

Confederación Intersindical Galega www.galizacig.com ÚLTIMA REVISIÓN: 26/01/2006 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta