ActualidadeVolver a Actualidade


Santiago, 7 de febreiro de 2006

Ante a pretensión da Empresa de despedir a 30 traballadores
Folga indefinida de Masa Galicia na mina de Meirama

 

CIG-Comunicación-

cig.prensa@galizacig.com


  Membros do Comité de Empresa de Masa Galicia, clic para aumentar
Diante da decisión de despedir a 30 traballadores dos 116 que forman parte do cadro de persoal no mes de febreiro, o Comité de Empresa facía público o pasado 27 de xaneiro o preaviso de convocatoria de folga indefinida a partir do 6 de febreiro, logo de que a empresa desoíra as reivindicacións dos traballadores. (Foto: Alejandro Barreiro (de pé no centro), presidente do Comité de Empresa de Masa Galicia, xundo a dous dos seus membros. ©galizacig.com).
 
O 6 de febreiro comezaba a folga indefinida en Masa Galicia S.A., na mina de Meirama, en demanda da recolocación dos traballadores na empresa principal e da prexubilación daqueles que cumpran os requisitos. Masa Galicia S.A. comunicou recentemente ao Comité de Empresa a súa intención de despedir a 30 traballadores neste mes de febreiro e 10 máis posibelmente no verán.

Masa Galicia S.A., que desenvolve a súa actividade da mina de Meirama, informaba ao Comité de Empresa da decisión de despedir a 30 traballadores, dos 116 que forman parte do cadro de persoal- no mes de febreiro. Masa xustificaba esta decisión en base a que é unha subcontrata de Limeisa e que está rematando a actividade de extracción de lignito en Meirama.

Diante desta decisión, o Comité de Empresa facía público o pasado 27 de xaneiro o preaviso de convocatoria de folga indefinida a partir do 6 de febreiro, logo de que a Empresa desoíra as reivindicacións dos traballadores. O Comité de Empresa xustificaba a súa decisión por:

  • Un plano de viabilidade para o futuro do cadro de persoal en Meirama que contemple o mantemento dos postos de traballo.

  • A aplicación dos coeficientes redutores.

  • O recoñecemento de cotizacións polo réxime da minería.

  • Por non informar ao comité sobre contratos, contas...

  • Por non cumprir as medidas de seguridade, en moitos postos de traballo, vehículos...

Ademais, o pasado 31 de xaneiro representantes do Comité de Empresa reuníanse co director xeral de Industria para solicitar a implicación desta Consellaría na solución do conflito que afecta a esta empresa.

Nesta xuntanza, o Comité de Empresa demandaba da Administración autonómica a súa implicación para que esta, xunto co concello e as empresas afectadas polo remate da extracción de lignito constituíran unha mesa para estudar todas as alternativas posíbeis de cara a evitar a perda dos postos de traballo e para que se estudara a súa recolocación ou prexubilación (naqueles casos que cumpriran os requisitos) a través do Plan Miner.

 
Volver a Actualidade

Volver ao princípio


Ir á páxina de inicio
Confederación Intersindical Galega
www.galizacig.com

ÚLTIMA REVISIÓN: 07/02/2006
cig.informatica


 

web-espello en www.galizacig.org
e
www.galizacig.net (mirrors)


Para estar ao día da actualidade sindical en Galiza, subscríbete á lista de correo da CIG e recibe puntual notificación das
novas informacións, artigos, documentos, publicacións, convenios colectivos... que ofrece a CIG na sua páxina web galizacig.com.

Apúntate en: http://www.elistas.net/lista/galizacig/alta