Actualidade / Opinión Santiago, 17 de febreiro de 2006 DESDE O VENTRE DA BALEA Abu Ghraib, Guantánamo: que democracia?   Rafa Villar- CIG-Normalización Lingüística Por se Abu Ghraib non fose nome suficiente para o gravar no lugar reservado ás infamias da Historia, outro nome, Guantánamo, vai lembrar no futuro os comportamentos do imperialismo norteamericano nos inicios do século XXI. A tortura elevada aos altares da práctica cotiá.   Aínda é ben que unha parte da chamada “comunidade internacional” parece que quere reaccionar, pedindo o peche definitivo do centro de reclusión de Guantánamo. A ONU e mais a Eurocámara veñen de facer senllos pronunciamentos nesa dirección. Até hoxe, fixérano pola boca pequena. Agora parecen querer abrila algo máis. Que lles dure así, aberta.   As atrocidades cometidas polo exército norteamericano na cadea de Abu Ghraib, no Iraq devastado e espoliado polo imperialismo, volven saír á luz estes días, por mor da divulgación de novas imaxes de torturas e vexacións a presos iraquís. Televisións e xornais de todo o mundo amosan este horror, unha vez máis. Algún que outro soldadiño descerebrado ou oficial de baixa graduación pagará o pato e será -suavemente- condenado por estes feitos. Ou se cadra nin iso. Os verdadeiros responsábeis, os mandos militares norteamericanos e os que tomaron a decisión de invadir Iraq e crear espantos como Abu Ghraib, é seguro que permanecerán na súa placidez, se cadra só un chisco anoxados por que alguén decidira facer públicas esas imaxes e pouco máis. Ai, as incomodidades de ter a responsabilidade de andar polo mundo a repartir democracia a esgalla! Son conscientes, ademais, de que ningún Tribunal Penal Internacional -e menos, o existente- os vai xulgar nin condenar... de momento. Por se Abu Ghraib non fose nome suficiente para o gravar no lugar reservado ás infamias da Historia, outro nome, Guantánamo, vai lembrar no futuro os comportamentos do imperialismo norteamericano nos inicios do século XXI. A tortura elevada aos altares da práctica cotiá. Un filme do británico Michael Winterbottom sinálao estes días no Festival de Cinema de Berlín, ‘Road to Guantanamo’ (“Camiño a Guantánamo”). Aínda é ben que unha parte da chamada “comunidade internacional” parece que quere reaccionar, pedindo o peche definitivo do centro de reclusión de Guantánamo. A ONU e mais a Eurocámara veñen de facer senllos pronunciamentos nesa dirección. Até hoxe, fixérano pola boca pequena. Agora parecen querer abrila algo máis. Que lles dure así, aberta. E por certo, quen queira interpretar con certo rigor sucesos como os habidos no mundo árabe e musulmán tras a publicación e posterior divulgación das coñecidas viñetas chufándose de Mahoma -e do que este representa-, debería pensar en lugares como Abu Ghraib e Guantánamo, debería tentar comprender o impacto que ten nesas sociedades guerras de conquista como a de Iraq ou debería saber ver en Palestina e o pobo palestino o reflexo dun sufrimento que comparten no mundo millares e millares de persoas. Abofé que o “choque de civilizacións” non é tal, malia o interese niso de boa parte das elites económicas, políticas e relixioso-culturais de Occidente e tamén de sectores no mundo islámico e musulmán. Fanatismos, o un e outro, que parecen necesitarse mutuamente para de desenvolveren segundo os seus propios plans, á marxe dos intereses e necesidades das súas propias poboacións. Santiago de Compostela, 17 de febreiro de 2006.

Rafa Villar, escritor e responsábel do Departamento de Normalización Lingüística da CIG.

Confederación Intersindical Galega www.galizacig.com ÚLTIMA REVISIÓN: 17/02/2006 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta