Actualidade
Vigo, 10 de marzo de 2006 As mulleres da CIG de Vigo celebran o 8 de marzo
A xornada comezou cunha asemblea de delegadas e delegados da CIG na que a secretaria comarcal da Muller de Vigo, Raquel Pazos Garrido, explicou ás persoas participantes a campaña confederal da Secretaría da Muller e Servizos Sociais “Nomear en feminino evita discriminacións no traballo, emprega o A e nomea co A”. Tamén se repartiron copias ás/aos presentes do folleto “Recomendacións para unha linguaxe non discriminatoria” editado pola Confederación Intersindical Galega. Posteriormente, ás 11:15 da mañá, ao remate da asemblea, as delegadas e delegados saíron do local da CIG portando carteis alusivos a esta campaña, reivindicando o emprego do “A” para nomear as categorías profesionais das mulleres que desempeñan as distintas profesións. Así, por exemplo, podían lerse nos carteis que portaban as mulleres, entre outros, “Eu non son Mecánico, Son MecánicA”, “Eu non son Pescador, Son PescadorA”, “Eu non son Carpinteiro, Son CarpinteirA”, “Eu non son Engraxador, Son EngraxadorA” ou “Eu non son Xuíz, Son XuízA”; do mesmo xeito, nos carteis que levaban os homes, entre outros, “Eu son Enfermeiro, Ela é EnfermeirA”, “Eu son Mestre, Ela é MestrA”, ou “Eu son Técnico, Ela é TécnicA”. Durante o percorrido polas rúas da cidade, as mulleres da CIG repartiron trípticos explicativos da campaña entre as/os viandantes nos que, ademais de informar desta iniciativa, se dan varias recomendacións para o uso dunha linguaxe non sexista e se aporta unha relación de locais da CIG onde poder informarse. Finalmente, e tras unha parada nas escaleiras do Museo de Arte Contemporánea (Marco) na rúa Príncipe de Vigo, a marcha rematou xunto á estatua do Sireno, na Porta do Sol, da que se colgaron catro pancartas co lema da campaña. As/os asistentes a este acto reivindicativo esviteron concentrados no lugar durante unha media hora, transcurrida a cal Raquel Pazos deu lectura a un manifesto cuio texto reproducimos a continuación.
Secretaría da Muller da CIG de Vigo Bo día compañeiras e compañeiros: É verdade que nos últimos tempos veñen de aprobarse diferentes medidas legais que recoñecen e tratan de avanzar cara á igualdade entre mulleres e homes, mais, se nos poñemos a analizar a realidade podemos afirmar que a taxa de pobreza feminina vai en aumento e supón máis do dobre da masculina. As causas deste feito son coñecidas por todas e todos nós: maior incidencia de desemprego entre as mulleres –maior eventualidade, traballo en negro e contratos a tempo parcial– segregación ocupacional –salarios máis baixos– maior dificultade para acceder a postos de responsabilidade ou dirección. Todos estes feitos veñen case sempre ligados á imaxe da muller como única responsable das cargas familiares; por iso, dende a nosa Central Sindical, traballamos arreo para o cumprimento e mellora das políticas de conciliación da vida laboral, familiar e persoal, non deixando nunca de lado que estas políticas son vinculantes para homes e mulleres, é evidente a necesidade de chegar a un reparto máis equitativo da carga de traballo, non esquezamos pois que a verdadeira conciliación pasa pola corresponsabilidade. Desde a Confederación Intersindical Galega pretendemos hoxe, con esta campaña, polo uso dunha linguaxe non sexista, difundir o emprego dunha linguaxe na que tamén se recoñeza e visualice o valor social das capacidades e funcións, así coma o gran número de actividades desenroladas polas mulleres. Porque no camiño cara á igualdade de mulleres e homes, a linguaxe desempeña un importante papel e a lingua ten os recursos precisos para nomear a mulleres e homes sen ocultar a ninguén e sen alterar as estruturas do idioma. Se somos capaces de facer un uso da linguaxe adecuado, lograremos representar o xénero das persoas sen discriminacións e representacións positivas nin negativas. Eliminando das nosas costumes un uso discriminatorio da linguaxe, cambiaremos a nosa concepción da realidade. Esta é unha loita de toda a clase traballadora, na que todas e todos estamos implicados. Así pois, e xa para rematar, vou a aproveitar a ocasión para dar lectura ás palabras dunha recoñecida muller no eido das nosas letras e compañeira ademais da nosa Central Sindical, Marta Dacosta, que din: Ordenemos o universo Lavemos a cuberta e botemos pola borda Tanto lastre inútil, E así, sen peso, Co universo ordenado Debuxemos un mapa para a viaxe. Unha aperta e grazas pola vosa participación. |
|||||||||||||||||||
|
|
|||||||||||||||||||
Informacións relacionadas
|
|||||||||||||||||||
|
|
|||||||||||||||||||
|
ÚLTIMA REVISIÓN: 10/03/2006 |
|||||||||||||||||||
|
