|
Actualidade CIG-Comunicación-
Esta concentración é só o primeiro paso dun calendario de mobilizacións que se van repetir regularmente nos centros de Froiz da comarca para dar a coñecer socialmente esta situación de precariedade laboral e para a que se está solicitando tamén a complicidade de clientes desta empresa para que realicen queixas á empresa e asinen un manifesto de apoio aos traballadores e traballadoras. Así, a campaña continuará até que a empresa solucione o problema ou se sente a negociar, e con seriedade, unhas condicións de traballo dignas. Reproducimos a continuación o comunicado das traballadoras e traballadores de Froiz e un texto tipo para realizar unha protesta mediante o formulario de contacto da páxina web de Froiz.
Comunicado En Supermercados Lorenzo Froiz os traballadores e traballadoras vimos soportando horarios de até 52 horas semanais desde hai xa demasiado tempo. Excédense todos os máximos legais: máximo diario, semanal, anual, o máximo de horas extras anuais e non se cumple o descanso entre xornadas en moitas ocasións. Se traballamos 40 horas, a empresa pretende, a cambio, quitarnos unhas cantidades que se veñen cobrando desde hai anos e que para nada compensan as horas extras que se realizan. Consideramos abusiva a postura da empresa que cada ano deixa de pagar máis de 3.000 euros por persoa en concepto de horas extras e agora pretende facernos perder máis dereitos. Queremos que se coñeza a situación de precariedade na que estamos realizando o noso traballo e que durante todo este tempo viñemos aguantando mentres os nosos representantes negociaban coa empresa. Agora, rotas as negociacións pola cerrazón de Supermercados Lorenzo Froiz, comezamos unha serie de mobilizacións e actos informativos para que sexa público e seguiremos así até que a empresa se sente con vontade real de arranxar os problemas. Exiximos: 1. Que dunha vez por todas se asuma a lexitimidade e a capacidade de representación dos nosos representantes sindicais, así como o fin das represalias. 2. Que se estableza un calendario laboral de 40 horas semanais que respecte todas as normativas legais sen que ningún traballador ou traballdora sufra mermas salariais. 3. Que se remate coa eventualidade e se cumpra coa porcentaxe que establece o convenio colectivo de 75% de indefinidos en plantilla e cumprindo esta porcentaxe en todas as categorías. 4. Que se estableza un sistema transparente no pago de incentivos e comisións por venda para rematar coa chantaxe que supoñen agora.
Copia o texto en vermello e pégao no lugar ao efecto (apartado “Observaciones”) do formulario de Contacto da páxina web de Froiz en: http://www.froiz.es/contacto.asp Como cliente de Supermercados Lorenzo Froiz teño coñecemento da situación de precariedade e abusos laborais na que desenvolven o seu traballo os empregados e empregadas da súa empresa. Nalgúns casos parece que vivan no centro de traballo, de tanto tempo que pasan alí, polo que considero urxente que se normalice esta situación cumprindo a legalidade e sen perda de dereito ningún. Polo tanto comunícolles a miña intención de deixar de mercar nos seus establecementos e de informar no meu círculo de familiar e social desta situación se esta non se modifica. |
||||||||||
|
||||||||||
|
ÚLTIMA REVISIÓN: 05/04/2006 |
||||||||||
|
