Actualidade / Opinión Santiago, 10 de marzo de 2006 DESDE O VENTRE DA BALEA Érase que se era un 10 de Marzo   Rafa Villar- CIG-Normalización Lingüística Dentro da súa aposta pola transformación en clave socialista e pola soberanía plena da nación galega, a CIG séntese cómoda avanzando na profundación dunhas coordenadas sindicais non pactistas, ao servizo exclusivo dos intereses e angueiras da clase traballadora galega e de todos e cada un dos traballadores e traballadoras galegas que se organizan ao seu redor.   Trinta e catro anos despois esa expresión da clase obreira galega deu callado no sindicalismo que representa a Confederación Intersindical Galega (CIG), central sindical que ocupa un lugar relevante no mundo do traballo do noso país e que serve de canle organizativa a máis de cincuenta e cinco mil traballadores e traballadoras. (Ilustración: Kelly and Kyle Phelps, “The Workers Alter”).   Cada 10 de marzo vólvenos a ollada a ese pasado inmediato da convulsa década dos 70 (do século pasado), que marcaba os estertores dunha ditadura que se prologara durante catro decenios. Corenta anos dun réxime fascista onde as liberdades estaban negadas e a represión atinxía a todos os eidos da vida das persoas. Nese contexto producíronse os dolorosos sucesos habidos en Ferrol no ano 1972, coa morte a mans da policías de dous traballadores (Amador e Daniel), tras a actuación das forzas da orde contra unha mobilización obreira. A resposta de raiba e solidariedade dos traballadores galegos foi detonante para a articulación dun novo espazo político-sindical, co abrollar do sindicalismo nacionalista como expresión organizada, que conxugaba a cuestión nacional cos intereses de clase. Trinta e catro anos despois esa expresión da clase obreira galega deu callado no sindicalismo que representa a Confederación Intersindical Galega (CIG), central sindical que ocupa un lugar relevante no mundo do traballo do noso país e que serve de canle organizativa a máis de cincuenta e cinco mil traballadores e traballadoras. O modelo de sindicalismo da CIG é certamente un modelo atípico dentro da evolución que viviu boa parte dos sindicatos da vella Europa, que acabaron institucionalizando e burocratizando as súas estruturas dentro dun deseño político-sindical de adecuación ao capitalismo imperante. Dentro da súa aposta pola transformación en clave socialista e pola soberanía plena da nación galega, a CIG séntese cómoda avanzando na profundación dunhas coordenadas sindicais non pactistas, ao servizo exclusivo dos intereses e angueiras da clase traballadora galega e de todos e cada un dos traballadores e traballadoras galegas que se organizan ao seu redor. Que se cualifique como atípico o modelo sindical da CIG non quere dicir nin moito menos que sexa algo marxinal ou residual, senón precisamente que debera un modelo a imitar e desenvolver, sobre todo por quen comparte escenario de actuación no espazo laboral galego. A clase obreira galega precisa de referentes sindicais nidiamente comprometidos coas súas necesidades e aspiracións como clase, nun momento como o actual en que a precariedade en todas as súas vertentes é o triste elemento identificador do mundo do traballo en Galiza. Un novo 10 de Marzo está aquí para lembrarnos un pasado de loitas e sacrificios da clase traballadora galega, mais tamén para sinalar a xusteza das nosas demandas e reivindicacións, nun tempo que transita entre os pequenos combates cotiáns e a necesidade de conquistarmos o futuro, outro futuro. Santiago de Compostela, 10 de marzo de 2006.

Rafa Villar, escritor e responsábel do Departamento de Normalización Lingüística da CIG.

Confederación Intersindical Galega www.galizacig.com ÚLTIMA REVISIÓN: 10/03/2006 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta