Actualidade Vigo, 1 de abril de 2006 Para denunciar a excesiva presión comercial, a extensión da xornada laboral e a falta de negociación das condicións laborais Representantes sindicais da CIG e UGT concentráronse diante da Xunta Xeral de Accionistas do Banco Gallego   CIG-Comunicación- cig.prensa@galizacig.com   Máis dun cento de representantes sindicais da CIG e UGT concentráronse o 31 de marzo diante da Xunta Xeral de Accionistas do Banco Gallego en Compostela. CCOO descolgábase da mobilización incumprindo o mandato que lle dera a Asemblea nacional de traballadores e traballadoras do Banco Gallego aos sindicatos. Esta concentración foi convocada para denunciar a excesiva presión comercial, a habitual extensión da xornada laboral polo serán e a falta de negociación das condicións laborais. As persoas concentradas fixeron chegar o malestar do cadro de persoal ao Consello de Administración e accionistas do Banco Gallego con berros como “O noso sacrificio é o voso beneficio”. A Sección Sindical da CIG decidiu intervir na Xunta Xeral de Accionistas do Banco Gallego por medio do seu portavoz Xosé Valcárcel Sánchez. (Fotos: ©galizacig.com 31/03/2006). Descarga o vídeo. (Formato do vídeo: Windows Media Video [wmv], duración: 2'24'', espazo en disco: 28.462.488 bytes [27,1 Mb]). Realización: Roi Ribeira.   Cumprindo co mandato que lle dera a Asemblea nacional de traballadores e traballadoras do Banco Gallego, máis dun cento de representantes sindicais da CIG e UGT, chegados de todo o país, concentráronse, tal como estaba previsto, o día 31 de marzo diante da Xunta Xeral de Accionistas desta Entidade, que se celebrou en Compostela. Esta concentración foi convocada para denunciar a excesiva presión comercial, a habitual extensión da xornada laboral polo serán e a falta de negociación das condicións laborais. “O noso sacrificio é o voso beneficio” As persoas concentradas fixeron chegar o malestar do cadro de persoal ao Consello de Administración e accionistas en xeral, que tiveron que escoitar berros denunciando a política laboral da entidade. Os máis coreados foron: “O noso sacrificio é o voso beneficio” ou “Negociación e non imposición”. Acordo con “nocturnidade e aleivosía” O xoves 30 de marzo, día anterior á esta concentración, estaba prevista unha reunión entre a Dirección de Persoal e os sindicatos, pero só acudiron CIG e UGT, non presentándose nin a empresa nin o outro sindicato, CCOO. Nesta xuntanza a CIG tiña previsto entregar unha táboa reivindicativa para facela chegar ao director xeral. Segundo relataron traballadores e traballadoras do Banco, de xeito sorprendente, a mesma mañá da concentración tiveron coñecemento dunha circular publicada pola empresa dando conta dun acordo entre esta e CCOO e, “nun acto de cinismo, explicaron que non fora posible que o resto das centrais sindicais se sumasen ao mesmo”. Deste xeito o sindicato asinante descolgábase da mobilización aprobada pola Asemblea de traballadores e traballadoras. A CIG interveu ante o accionariado do Banco Ante esta situación e malia non estar previsto, a Sección Sindical da CIG decidiu intervir na Xunta Xeral de Accionistas, por medio de Xosé Valcárcel Sánchez, portavoz da Sección Sindical. Xosé Valcárcel Comezou a súa intervención felicitando ao Consello de Administración e especialmente ao persoal do banco polos excelentes resultados do exercicio correspondente ao ano 2005 para, acto seguido, denunciar o comportamento inxustificado da Dirección de Recursos Humanos que, “pese a estar prevista unha xuntanza co director xeral do Banco para os próximos días na que se tratarían os problemas laborais que afectan ao persoal, chegou a un acordo cunha parte da representación sindical con nocturnidade e aleivosía, para tratar de evitar a mobilización”. Táboa reivindicativa Dado que a CIG non tivo oportunidade de facer entrega das súas reivindicacións á empresa o día anterior, Valcárcel pasou a ler un documento que recolle as negociacións pendentes dos últimos anos, que se poden resumir en cinco grandes bloques: Acordo de formación. Acordo de melloras extraconvenio. Exteriorización dos complementos de pensións. Política laboral e condicións de traballo nas oficinas. Comportamento de Recursos Humanos cos sindicatos e especialmente coa Sección Sindical da CIG. Despois desta mobilización a pelota está, segundo sinalan os representantes dos sindicatos convocantes, no tellado da empresa, e dende a Sección Sindical da CIG agardan que se produza a reunión pendente co director xeral para desbloquear un conflito que non dan por rematado.

Informacións relacionadas 30/03/2006 CIG e UGT denuncian a conflitividade laboral no Banco Gallego e a negativa da Dirección a negociar 24/03/2006 A Dirección tense atopado cunha resistencia inesperada na implantación dunha agresiva política laboral e comercial Rebelión sindical no Banco Gallego: Nin tardes, nin presión, dereitos laborais

Confederación Intersindical Galega www.galizacig.com ÚLTIMA REVISIÓN: 14/04/2006 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta