Actualidade Santiago, 5 de maio de 2006 De dilatarse o conflito, os sindicatos anuncian unha folga xeral en toda a provincia Acórdase presentar convocatoria de folga en todo o Metal, incluído o sector do automóbil, en Pontevedra   CIG-Comunicación- cig.prensa@galizacig.com   Antolín Alcántara avaliou o seguimento da folga como un éxito e denunciou os intentos dos medios de comunicación por diluír o conflito, centrándose máis nos escasos incidentes que se produciron que nas causas que están a provocar a convocatoria de folga. (Fotos: ©galizacig.com 04/05/2006). Os sindicatos, na xuntanza celebrada o xoves 4 de maio, acordaron que se o próximo xoves non se ten solucionado o conflito provocado pola negociación colectiva do Metal, se presentará unha convocatoria de folga para toda a provincia de Pontevedra na que estarán incluídas as empresas do automóbil, tanto de fabricantes como das auxiliares e de todo o sector. Deste xeito, a folga afectaría a uns 37.000 traballadores e traballadoras. Ademais, a semana que vén poderían acordar convocar unha folga xeral na provincia. A falta de diálogo e o silencio da Delegación da Consellaría de Traballo na provincia de Pontevedra, que “é quen ten a responsabilidade de mediar no conflito”, segundo explica o secretario confederal de Negociación Colectiva da CIG, Antolín Alcántara, vén de provocar que na última xuntanza, os sindicatos implicados na folga do Metal acordaran presentar convocatoria de folga para toda a provincia de Pontevedra. Así, a folga se estendería a máis de 37.000 traballadores, incluíndo a todas as empresas auxiliares e de fabricación de automóbil e a todo o Metal en xeral. Seguimento masivo tanto da folga como das mobilizacións Alcántara avalía o seguimento da folga como un éxito xa que tamén na segunda xornada foi secundada por todo o sector. Alén diso, sinala que tanto ás concentracións como á manifestación concorreron miles de traballadores de Vigo e de Pontevedra. O secretario confederal de Negociación Colectiva denuncia tamén os intentos dos medios de comunicación por diluír o conflito, centrándose máis nos escasos incidentes que se produciron que nas causas que están a provocar a convocatoria de folga. Xunto a iso, Antolín Alcántara salienta, ademais, que as mobilizacións que se están a producir neste conflito están contando cun seguimento “como nunca houbo” nun conflito destas características.

Informacións relacionadas 04/05/2006 Malia os intentos de acordo non se achegan posturas coa patronal Éxito rotundo na primeira xornada de folga do Metal da provincia de Pontevedra 03/05/2006 Afecta a 2.800 empresas e 20.000 traballadores/as desde as 0:00 horas do mércores 3 de maio Comeza a folga indefinida no Metal de Pontevedra

Confederación Intersindical Galega www.galizacig.com ÚLTIMA REVISIÓN: 05/05/2006 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta