|
Actualidade CIG-Comunicación-
A manifestación foi convocada como culminación dunha primeira fase dunha campaña iniciada con asembleas e concentracións en todas as comarcas de Galiza, para denunciar esta nova reforma laboral pactada por CCOO, UGT, CEOE e o Goberno do Estado e para denunciar “un modelo sindical, unha forma de sindicalismo contrario aos intereses da clase traballadora”, tal e como afirmou o secretario xeral da CIG, Suso Seixo na súa intervención. A respecto da actual Reforma Laboral, Seixo sinalou ademais que “favorece fundamentalmente os intereses da patronal” e explicou que afonda nas aprobadas no ano 1997 e no 2001 que supuxeron “abaratar e facilitar o despedimento, o transvase de miles de millóns de euros (17.500) ás arcas dos empresarios, sen que diminuíse a temporalidade, que era o teórico obxectivo”. Alén diso, o secretario xeral salientou aqueles aspectos máis negativos para a clase traballadora que se introducen con esta “contrarreforma”, como a extensión dos contratos fomento da contratación indefinida, que reducen as indemnizacións a 33 días por ano traballado, a ampliación das subvencións aos empresarios, de 2 a 4 anos ou a “legalización da fraude na contratación, permitindo o encadeamento de contratos durante 24 meses nun período de 30”. O máis preocupante para Suso Seixo é o papel xogado polas centrais sindicais CCOO e UGT. A este respecto, afirmou que “están claros os beneficios da patronal” e cuestionou “cales son os beneficios de UGT e CCOO?”. Unha pregunta á que deu resposta asegurando que “cremos que non é casual que antes deste acordo se asinase outro sobre o reparto dos fondos de Formación Continua ou mesmo a compensación feita á UGT por incautación do patrimonio histórico”. Seixo foi aínda máis rotundo ao cuestionar este tipo de prácticas sindicais e asegurou que “as centrais sindicais estatais non están en condicións de levar adiante unha reforma deste modelo produtivo baseado na precariedade e nos baixos salarios”. Fronte a isto explicou que a CIG defende a necesidade de “mobilizarse contra a precariedade laboral como única garantía de que se adopten medidas efectivas” e lembrou o conseguido no convenio de Metal de Pontevedra, grazas as mobilizacións dos traballadores e traballadoras do sector. O secretario xeral da CIG rematou reafirmando a necesidade dun Marco Galego de Relacións laborais con plenas competencias “se queremos ter garantías para mellorar o actual marco de relacións laborais”. |
||||||||||||||||||||||
|
||||||||||||||||||||||
Informacións relacionadas
|
||||||||||||||||||||||
|
||||||||||||||||||||||
|
ÚLTIMA REVISIÓN: 29/06/2006 |
||||||||||||||||||||||
|
||||||||||||||||||||||
