Actualidade Santiago, 28 de xuño de 2006 A CIG sinala gravidade do feito e pídelle á Xunta que ampare os dereitos lingüísticos dos galego-falantes A Consellaría de Sanidade recrimina a unha empresa por utilizar o galego na súa etiquetaxe   CIG-Comunicación- cig.prensa@galizacig.com   Con base nun Real Decreto do ano 1999, que privilexia o uso do castelán fronte aos outros idiomas oficiais do Estado (feito dubidosamente democrático), o devandito Servizo de Protección da Saúde da Xunta de Galiza ameaza á empresa Eurofruit con “tomar as medidas oportunas” no caso de que non empregue o español na etiquetaxe dos seus produtos alimentarios, produtos que teñen como destinatarios os cidadáns galegos. (Foto: María José Rubio Vidal, conselleira de Sanidade).   O Departamento de Normalización Lingüística da Confederación Intersindical Galega (CIG) acaba de ser coñecedor do contido dun escrito do Servizo de Protección da Saúde da Delegación Provincial de A Coruña da Consellaría de Sanidade no que se recrimina á empresa Eurofruit Santiago SL pola utilización da lingua propia de Galiza. Con base nun Real Decreto do ano 1999, que privilexia o uso do castelán fronte aos outros idiomas oficiais do Estado (feito dubidosamente democrático), o devandito Servizo de Protección da Saúde da Xunta de Galiza ameaza á empresa Eurofruit con “tomar as medidas oportunas” no caso de que non empregue o español na etiquetaxe dos seus produtos alimentarios, produtos que teñen como destinatarios os cidadáns galegos. Produce indignación que a estas alturas de desenvolvemento autonómico desde as administracións públicas galegas se estean a menoscabar os dereitos lingüísticos dos galegos, condenando á lingua galega a un papel secundario e marxinal. E máis tratándose dun novo Goberno, de coalición entre o PSOE e o BNG, que asinaran no pacto de Goberno que a normalización do idioma galego era un dos elementos centrais, dando satisfacción a unha demanda social de décadas no noso país. Nese sentido, e ante a gravidade do feito, a CIG insta ao Goberno da Xunta e aos partidos que o sustentan a modificar, á maior brevidade posíbel, estas actitudes de belixerancia contra a lingua deste país, e eviten discrimacións como a sinalada. O primeiro ano de novo Goberno practicou unha política lingüística continuísta respecto da anterior, na que non se está a facer unha aposta seria e coherente en prol da lingua propia de Galiza, desenvolvendo o Plan Xeral de Normalización da Lingua Galega aprobado polo Parlamento no anterior período de sesións. Plan que debería ser a auténtica “folla de ruta” en materia normalizadora para o Goberno da Xunta. Santiago de Compostela, 27 de xuño de 2006. Departamento de Normalización Lingüística da Confederación Intersindical Galega (CIG).     Descarga en .pdf   Escrito do Servizo de Protección da Saúde da Delegación Provincial de A Coruña da Consellaría de Sanidade no que se recrimina á empresa Eurofruit Santiago SL pola utilización da lingua propia de Galiza

Confederación Intersindical Galega www.galizacig.com ÚLTIMA REVISIÓN: 28/06/2006 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta