|
Actualidade
Santiago, 20 de xuño de 2006
Apróbase a Proposición
non de Lei do BNG de adoptar medidas para rematar co acoso laboral en Dozón
| |
 |
| Blanco Parga describiu a situación de
Ana Lois Navaza “confinada nun espazo de dous metros, ten prohibido o acceso ao resto de dependencias municipais
e ao fax, non se lle permite atender ningunha chamada, e non se lle asigna ningún traballo, a pesar de telo
solicitado en numerosas ocasións, ao tempo que os empregados e empregadas do Concello teñen orde
expresa de non se dirixir a ela”. (Foto:
©galizacig.com 30/01/2006). |
| |
O portavoz de Emprego do Grupo Parlamentar do
BNG, Fernando Blanco Parga, defendeu na Comisión Quinta do Parlamento, o pasado 23 de xuño, unha
Proposición non de Lei, que foi aprobada cos votos a favor dos grupos que sustentan o Goberno. Na proposición
ínstase ao Goberno galego a que adopte “cantas medidas estean ao seu alcance para rematar, de xeito inmediato,
co asedio moral de que é obxecto unha traballadora por parte do alcalde de Dozón”.
O parlamentar relatou a historia deste proceso
que comezou no ano 1999, cando a traballadora se presentou ás eleccións municipais na lista do BNG.
Isto, tal e como lembrou o deputado, “non é unha opinión, senón un feito refrendado por máis
de vinte sentenzas xudiciais, que están sen executar, a favor da traballadora que relacionan o inicio do
acoso co momento en que se presentou como candidata en Dozón”.
Blanco Parga describiu a situación de Ana
Lois Navaza “confinada nun espazo de dous metros, ten prohibido o acceso ao resto de dependencias municipais e
ao fax, non se lle permite atender ningunha chamada, e non se lle asigna ningún traballo, a pesar de telo
solicitado en numerosas ocasións, ao tempo que os empregados e empregadas do Concello teñen orde
expresa de non se dirixir a ela”.
Como consecuencia desta situación, a traballadora
padece un desequilibrio psíquico e está a ser atendida no hospital de Conxo dende o ano 2002 con
numerosos síntomas relacionados co seu problema psíquico.
O portavoz de emprego lembrou que esta situación
e a actitude do alcalde están “a lesionar os dereitos básicos da persoa” e insistiu na “gravidade”
deste caso, sobre o que opinou que, “non creo e espero que non exista ningún semellante no noso país”.
O texto aprobado insta ao Goberno a requirir do
Concello que anule as resolucións adoptadas contra a traballadora e a emprender reformas legais “para perseguir
o asedio moral no traballo e a protección efectiva das vítimas, introducindo na lexislación
funcionarial a posibilidade de cambio de posto de traballo por motivos de saúde”.
A Proposición non de Lei insta tamén
a que o Goberno español adopte medidas legais e administrativas de loita contra o acoso moral no traballo,
“tanto no eido privado, como no público”.
|
