Actualidade Santiago, 17 de xuño de 2006 Folga de 48 horas en Einsa Print en demanda do calendario laboral   CIG-Comunicación- cig.prensa@galizacig.com   Os traballadores/as, 400 en total, dos que 270 son fixos/as, demandan que se contrate máis persoal e que as condicións dos contratados/as temporais, na súa maioría procedentes de ETTs, teñan condicións laborais dignas, xa que algúns traballan mesmo en fin de semana e teñen un salario inferior aos seus compañeiros/as indefinidos. (Fotos: ©galizacig.com 15/06/2006). Descarga o vídeo. (Formato do vídeo: Windows Media Video [wmv], duración: 4'15'', espazo en disco: 29.007.102 bytes [27,6 Mb]). Realización: Roi Ribeira.   O 100% dos traballadores/as de taller de Einsa Print SA e Edicións Informatizadas SA, empresas que conforman o mesmo grupo e que desenvolven a súa actividade en As Pontes, sumáronse á folga de 48 horas convocada en demanda do calendario laboral os días 15 e 16 de xuño. Os traballadores/as queren que se cumpra a lexislación en temas como descansos ou quendas pero a empresa négase sequera a entregar o calendario. Alberte Amado, membro do Comité de Empresa e representante da CIG, explica que os traballadores/as destas empresas dedicadas a edicións informatizadas de revistas, guías, formularios... xa convocaran, hai un mes, outra folga e concentracións cos traballadores/as pola negativa a da empresa a entregar o calendario laboral. Amado afirma que “non se cumpre a lexislación en temas como descansos de turnos e temos un xeceso de xornada”. Malia estas condicións, os traballadores/as estaban dispostos a chegar a un acordo pactando unhas condicións. “Se queren flexibilidade”, sinala Amado, “aos traballadores/as teranos que supor algo”. A folga prevista para o día 30 de maio fora desconvocada. Catro días antes, o 26 de maio, houbo unha concentración que se convocou logo de que a empresa se saltara a dilixencia imposta pola Inspección de Traballo, que obrigaba a entregar o calendario laboral. Para evitar a celebración da folga, a empresa entregou o calendario e comprometeuse a seguir negociando. Porén, até hoxe a empresa non entregou ningunha proposta, nun intento de dilatar o tema e “semella como que se non os forzas non queren facer nada. Por iso convocamos estes dous días de folga”, di Alberte Amado quen engade que houbo unha xuntanza previa nun intento de desconvocar a folga, onde a empresa se comprometeu a valorar a proposta dos traballadores/as ou a presentar unha contraproposta. “Entendemos que se foran a aceptar xa o terían feito”. Os traballadores/as, 400 en total, dos que 270 son fixos/as, demandan que se contrate máis persoal e que as condicións dos contratados/as temporais, na súa maioría procedentes de ETTs, teñan condicións laborais dignas, xa que algúns traballan mesmo en fin de semana e teñen un salario inferior aos seus compañeiros/as indefinidos. A representación da CIG en Einsa Print SA é de 5 membros do Comité de Empresa dun total de sete e en Edicións Informatizadas SA é de 8 membros de 8.

Confederación Intersindical Galega www.galizacig.com ÚLTIMA REVISIÓN: 29/06/2006 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta