|
Actualidade
Santiago, 19 de xuño de 2006
Presentaron alegacións á Instrutora
do Expediente de Responsabilidade Patrimonial
O colectivo de afectados polas obras do Porto Exterior responsabiliza ao PSOE da falta de solucións
| |
 |
| Porén, o colectivo de afectados non cuestiona
a necesidade de construír un novo Porto para a cidade de A Coruña, pero si subliñan que esta
obra pública ten provocado a desaparición da pesca e marisqueo nesa concreta zona do litoral, recoñecida
pola Administración cun pronunciamento ao respecto da propia Consellaría de Pesca. |
| |
O colectivo de afectados polas obras do Porto
Exterior de A Coruña vén de presentar alegacións para solicitar que se actúe con “criterio
voluntarista, con racionalidade e bo sentido” para darlle unha solución inmediata ás demandas de
indemnización presentadas. Os afectados lembran que a propia Declaración de Impacto Ambiental recoñece
as repercusións das obras e que a Administración tamén avala a súa demanda e responsabilizan
ao PSOE do atraso na adopción de medidas que solucionen a situación.
Os afectados alegan que todos son posuidores de
permisos de explotación para exercer a pesca e o marisqueo, permisos expedidos e avalados pola Consellaría
de Pesca e que está previsto que cando o Goberno acorda e aproba unha obra de intereses xeral que poida
dar lugar á responsabilidade patrimonial do Estado está establecido o “dereito dos particulares a
ser indemnizados de toda lesión que sufran en calquera dos seus bens e dereitos, agás nos casos de
forza maior, sempre que a lesión sexa consecuencia da adopción de medidas non fiscalizábeis
na vía contenciosa”.
Alén diso, nas alegacións matizan
que a Lei de Expropiación forzosa e a de Réxime Xurídico da Administración do Estado
abranguen a lesións en “calquera dos bens e dereitos consecuencia do funcionamento de referidos servizos
públicos” sempre que o dano alegado polos particulares sexa “efectivo, avaliábel economicamente e
individualizado con relación a unha persoa ou grupo de persoas”.
Canto á avaliación económica
incorporan o informe elaborado polo Grupo de Investigación de Economía Pesqueira e de recursos Naturais
da Universidade de Santiago de Compostela, no que con sumo detalle, precisión e técnica se bosquexa
tanto a orixe da lesión producida, os danos e prexuízos causados como a cuantificación destes.
Porén, o colectivo de afectados non cuestiona
a necesidade de construír un novo Porto para a cidade de A Coruña, pero si subliñan que esta
obra pública ten provocado a desaparición da pesca e marisqueo nesa concreta zona do litoral, recoñecida
pola Administración cun pronunciamento ao respecto da propia Consellaría de Pesca.
Unhas repercusións que xa estaban estimadas
mesmo na Declaración de Impacto Ambiental que di textualmente que estas novas instalacións “producirán
unha perda de ingresos e de emprego na actividade pesqueira e marisqueira, debido á redución da área
dedicada a esta actividade”.
Paulo Carril, portavoz do colectivo e secretario
comarcal da CIG de A Coruña lembra que “estamos, polo tanto ante unha reivindicación obxectiva e
con causa, cunha cuantificación ou determinación de danos que non se fundan en meras expectativas”.
Carril engade que, por outra banda, “está
máis que constatada a desaparición física dunha zona de traballo de cuxa explotación
teñen como único medio de vida” o colectivo de afectados.
O portavoz do colectivo demanda tamén da
Instrutora do Expediente de Responsabilidade Patrimonial que non se prolongue máis o expediente e que se
chegue a un acordo consensuado “cifrando nunha cantidade a indemnización que poida cubrir todos os conceptos
que se estiman indemnizábeis de cada un deles” e engade que “con iso tamén cesaría a protesta
e conflitividade que iso está xerando, zanxando esta demanda en vía administrativa”.
|
