Actualidade Santiago, 14 de xullo de 2006 Demandan un cambio de trazado do AVE para que se manteñan os postos de traballo Os traballadores de Ramsa e Ferroatlántica en Sabón e Cee concéntranse en San Caetano   CIG-Comunicación- cig.prensa@galizacig.com   Os traballadores de Ramsa e Ferroatlántica apelan á responsabilidade para preservar a plena viabilidade da explotación mineira de Serrabal, e polo tanto dos postos de traballo, subliñando que non é incompatíbel co desenvolvemento en tempo e forma das infraestructuras ferroviarias no noso País, na Galiza. Os traballadores estiveron arroupados en todo momento por representantes da CIG, destacando na concentración a presenza de Suso Seixo, secretario xeral, e de Anxo Noceda, secretario comarcal de Compostela. (Fotos: ©galizacig.com 13/07/2006).   Os traballadores de RAMSA e FERROATLÁNTICA en Sabón e Cee, concentráronse o xoves, día 13 de xullo, ás 11:30 horas, diante dos edificios administrativos da Xunta de Galiza en de San Caetano, en defensa dos postos de traballo e en demanda de que administración autonómica, estatal e empresa poñan todos os medios posíbeis para que se leve a cabo unha alternativa que combine a necesaria defensa dos postos de traballo e o completo desenvolvemento das infraestruturas ferroviarias. Os Comités de Empresa sinalan que a Mina de Serrabal constitúe unha actividade mineira de grande importancia e riqueza para o noso País –sendo polo tanto circunstancial á empresa que teña nun ou outro momento esta concesión-. Así, lembran que desta mina se extrae, entre outros minerais, seixo de altísima calidade (silicio solar) que está a servir para desenvolver proxectos pioneiros en I+D+i. Boa proba disto é que no ano 1999, cando esta explotación viviu un cambio de concesionaria, os antigos propietarios da explotación, unha empresa con capital noruegués, condicionaron a contratación de sendas fragatas a IZAR a garantirlles un mínimo de toneladas/ano deste mineral. Xunto a iso, consideran que tanto desde a Administración do Estado como desde a Administración autonómica débese tomar esta cuestión coa importancia que se merece, máis aínda cando están en cuestión varios centos de postos de traballo e apelan á responsabilidade para preservar a plena viabilidade desta explotación mineira, e polo tanto dos postos de traballo, subliñando que non é incompatíbel co desenvolvemento en tempo e forma das infraestructuras ferroviarias no noso País, na Galiza. Os traballadores e traballadoras afectados afirman que a única opción posíbel é garantir a plena viabilidade desta explotación mineira para manter así a globalidade dos postos de traballo e salientan que de nada sirve “que a indemnización pola posíbel expropiación de terreos da mina sexa maior ou menos”. Alén diso, reiteran a defensa dos postos de traballo existentes, non só na mina, senón tamén nas industrias dependentes (Cee e Sabón) e, polo tanto, a defensa de presente e futuro da total viabilidade desta explotación mineira.

Informacións relacionadas 07/04/2006 Os traballadores de RAMSA preocupados polas informacións publicadas a respecto do trazado do AVE

Confederación Intersindical Galega www.galizacig.com ÚLTIMA REVISIÓN: 14/07/2006 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta