Actualidade Santiago, 20 de setembro de 2006 Convocan unha manifestación en Ordes o sábado 30 de setembro Os traballadores das auxiliares de Meirama exixen que se efectivicen as prexubilacións e recolocacións   CIG-Comunicación- cig.prensa@galizacig.com   Os traballadores da mina demandan os mesmos dereitos e o mesmo futuro que se lle garante a todos os traballadores das empresas principais das Minas de Carbón do Estado Español e de Galiza (Endesa e Limeisa), salientando que a maior parte deles levan traballando desde o principio da explotación “para que FENOSA (grupo ao que pertence Limeisa), se teña enriquecido e aproveitado dos millonarios beneficios obtidos da explotación do carbón en Meirama e da produción de enerxía na Central Térmica de Meirama”.   A CIG vén de convocar unha manifestación para o próximo sábado 30 de setembro en Ordes diante do inminente peche da mina de lignito pardo de Meirama e diante da redución de actividade que representa para o conxunto das empresas auxiliares. A CIG e os traballadores destas empresas veñen reivindicando, desde hai meses, alternativas e solucións á perda de 220 postos de traballo sen que, polo momento, se dera resposta. Diante do silencio e a pasividade das direccións de Limeisa e de Fenosa, ás que lle teñen solicitado xuntanzas para abrir unha negociación que dea solución ás reivindicacións de incorporacións, prexubilacións e recolocacións para o cadro de persoal afectado polo peche da Mina Limeisa, CIG e traballadores acordaron convocar unha manifestación que terá lugar o día 30 de setembro. Os traballadores da mina demandan os mesmos dereitos e o mesmo futuro que se lle garante a todos os traballadores das empresas principais das Minas de Carbón do Estado Español e de Galiza (Endesa e Limeisa), salientando que a maior parte deles levan traballando desde o principio da explotación “para que FENOSA (grupo ao que pertence Limeisa), se teña enriquecido e aproveitado dos millonarios beneficios obtidos da explotación do carbón en Meirama e da produción de enerxía na Central Térmica de Meirama”. Ademais, inciden en que non se pode esquecer que as dúas minas de carbón galegas producen, en termos equivalentes, o 19% do carbón do Estado español e que a produción de enerxía a través das centrais térmicas de Cerceda e As Pontes “fixeron e fan un gran favor para o desenvolvemento do Estado español”. A CIG, xunto cos traballadores, demanda que FENOSA e o Ministerio de Industria –primeiro encargado de levar adiante o Plan Miner II, que contén as alternativas para o peche das minas-, así como o resto das administracións (Xunta e concellos), asuman a súa responsabilidade diante das graves consecuencias laborais que estes peches representan para os concellos afectados, principalmente Cerceda e Ordes. Tamén exixen que Limeisa asuma o Acordo ao que se chegou na Mesa das Auxiliares do Carbón na Consellaría de Industria e que supón a incorporación a Limeisa dos traballadores das empresas auxiliares que podan acceder a unha prexubilación; un plano de recolocacións para o resto do persoal dentro do grupo Fenosa e dentro dun plano de emprego e reindustrialización da zona. Campaña de sensibilización CIG e traballadores acordaron, na asemblea celebrada o sábado 2 de setembro, ademais desta manifestación, un calendario de peches de delegados e traballadores e levar a cabo unha intensa campaña de sensibilización e implicación de todos os sectores sociais e económicos da comarca –delegados das empresas de Ordes e Cerceda, Asociacións de veciños, Asociacións de Comerciantes– de todos os partidos políticos e alcaldes, diante deste grande problema de destrución de emprego que incide en todos os sectores. A campaña estenderase todo o mes de setembro e a manifestación suporá a súa culminación. Malia iso, a asemblea tamén valorou e acordou que, de non dar pasos Limeisa e Fenosa para chegar a unha solución, unha vez finalizado este calendario concretaranse novas medidas, entre outras, novas xornadas de folgas. “Non imos consentir”, afirman, “que o peche da mina de Limeisa se faga sen dar solución a todos os traballadores das empresas auxiliares, algúns con tanta antigüidade na mina como a propia mina”.

Informacións relacionadas 27/07/2006 Novas xornadas de folga na minaría do carbón de Cerceda e As Pontes 20/07/2006 A CIG considera un descrédito para CCOO e UGT, que non se sumaron á folga Comezou a folga nas minas de carbón cun seguimento do 100% 14/07/2006 Hai un compromiso de acordo sen ratificar pola ausencia de Endesa na xuntanza e a mobilización se mantén A CIG fai un chamamento a CCOO e UGT para que secunden a folga nas minas de Cerceda e As Pontes 12/07/2006 Desde as 23:00 horas do 19 de xullo até as 24:00 horas día 20, e desde as 23:00 horas do 25 de xullo ás 24:00 horas do 27 Anúnciase convocatoria de folga nas minas galegas do Carbón, Limeisa e Endesa e Auxiliares 16/05/2006 O BNG demanda no Parlamento de Galiza medidas para os traballadores das auxiliares do carbón 08/05/2006 Galiza discriminada no Plan do Carbón asinado por CCOO e UGT 10/03/2006 Só recibirá 135 dos 195 millóns que lle corresponderían tendo perdido xa 140 no período 1998-2005 A CIG considera que o reparto dos fondos do Plan do Carbón 2006-2012 discriminan a Galiza 26/01/2006 No período 1998-2005 tan só recibiu 64 dos 200 millóns que lle correspondían Galiza discriminada no reparto de fondos mineiros

Confederación Intersindical Galega www.galizacig.com ÚLTIMA REVISIÓN: 20/09/2006 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta