Actualidade Vigo, 27 de outubro de 2006 Acudirán á xuntanza Antón Louro, Ana Pastor e Olaia Fernández A Federación da Construción reúnese cos portavoces galegos no Congreso para tratar a cuestión da silicose   CIG-Comunicación- cig.prensa@galizacig.com   A Federación da Construción da CIG levaba desde o ano 2000 actuando para denunciar a situación na que se atopan os traballadores/as das canteiras, que non teñen coeficientes redutores pola silicose, esta non está recoñecida como enfermidade profesional, ademais de que traballan con outros condicionantes moi duros para a súa saúde como é o ruído (un 70% deles teñen problemas de audición), posturas forzadas, e traballan ao aire libre, baixo unha moi dura climatoloxía. (Foto: Canteira de granito en O Porriño. ©galizacig.com).   Este venres 27 ás 11:30 da mañá en Pontevedra representantes sindicais da Federación da Construción da CIG reuniranse con representantes parlamentares de PSOE, BNG e PP para solicitarlles os seus apoios ás iniciativas presentadas no Ministerio de Traballo para a revisión e incremento dos coeficientes redutores e o recoñecemento das enfermidades profesionais, caso da silicose, dos traballadores das canteiras. En marzo deste ano, publicouse un estudo elaborado polo Instituto Nacional da Silicose no que se sinalaba que 77 de cada 400 traballadores da mostra (algo máis dun 17,5%) que traballan nas canteiras de granito padecían silicose en maior ou menor grao. A Federación da Construción da CIG levaba desde o ano 2000 actuando para denunciar a situación na que se atopan os traballadores/as das canteiras, que non teñen uns coeficientes redutores mínimos pola silicose, esta non está recoñecida como enfermidade profesional, ademais de que traballan con outros condicionantes moi duros para a súa saúde como é o ruído (un 70% deles teñen problemas de audición), posturas forzadas, e traballan ao aire libre, baixo unha moi dura climatoloxía. Só aos traballadores que traballan na extracción se lles aplican coeficientes redutores. Estes coeficientes, paradoxalmente, están por debaixo dos que se lles aplican aos mineiros, aínda que a presenza de sílice libre nas canteiras é dun 21,5%, moito maior que no caso das minas. Para CIG-Construción, hai un fallo en cadea das responsabilidades: desde as Administracións galega e española, os empresarios e as mutuas. Na xuntanza que manterán este venres con PSOE, BNG e PP, os representantes sindicais da CIG trasladaranlles o escrito remitido ao Ministerio de Traballo no que se solicitaba un incremento e actualización dos coeficientes redutores actuais e a súa extensión ao sector da transformación, a racionalización da adxudicación dos mesmos e o recoñecemento de prestacións para todos os afectados de silicose. Nesta reunión buscarán o apoio dos tres grupos políticos xa que atender ás demandas de saúde laboral dos traballadores das canteiras é unha cuestión para CIG-Construción de “vontade política” e debería ser unha prioridade para estes grupos políticos.

Confederación Intersindical Galega www.galizacig.com ÚLTIMA REVISIÓN: 27/10/2006 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta