Actualidade Vigo, 3 de novembro de 2006 A temporalidade non é un premio!! A CIG contestou na rúa ao concurso de Coaxis   CIG-Comunicación- cig.prensa@galizacig.com   Para a CIG este concurso non era máis que unha selección de persoal que a empresa pretendía utilizar publicitariamente para beneficio propio, convertendo en involuntarias protagonistas ás persoas paradas necesitadas dun emprego. (Fotos: ©galizacig.com 02/11/2006). Onte, 2 de novembro, a CIG Telemárketing e a CIG Mocidade realizaron unha concentración ante as instalacións de Coaxis España en Vigo, coincidindo coa celebración do II Concurso de Telemárketing, que realiza esta empresa especializada na venda de conxelados por teléfono e que premia aos ganadores cun posto de traballo fixo e varios temporais. Ás dez da mañá un grupo de sindicalistas convocados pola CIG cunha importante presenza de mozos e mozas, concentráronse diante da empresa Coaxis na rúa Florida en Vigo denunciando a realización dun concurso por parte da empresa no que os premios eran un contrato fixo e tres contratos temporais xunto con pequenas bolsas en efectivo ou en bonos de produtos conxelados. Durante toda a concentración, que se prolongou ata as 11:30 horas, coreáronse consignas contra a temporalidade e contra a actuación de Coaxis, por entender que atenta contra a dignidade dos traballadores e das traballadoras. “Queremos un traballo non un Gran Hermano”, ou “A temporalidade non é un premio” foron algúns dos berros máis coreados polas persoas alí concentradas. Para a CIG este concurso non era máis que unha selección de persoal que a empresa pretendía utilizar publicitariamente para beneficio propio, convertendo en involuntarias protagonistas ás persoas paradas necesitadas dun emprego. Por outra banda, a empresa publicitaba un contrato indefinido para quen gañara o concurso, cando na propia empresa hai traballadores/as con contratos temporais, o que supón un engano e incluso pode ser un fraude na contratación. Con todo, para a CIG un contrato temporal non é un premio, e lembran que o Sector de Telemárketing, ao que pertence esta empresa, caracterízase pola alta taxa de temporalidade. O Convenio Colectivo estatal autoriza ás empresas para que ata un 70% dos contratos do persoal de operacións sexan temporais. Varias persoas que estiveron no concurso destacaron o escaso número de participantes presentes finalmente no mesmo. Coaxis tivo a publicidade de balde que procuraba, pero non foi tan positiva como agardaba.

Informacións relacionadas 01/11/2006 Conseguir publicidade a costa da precariedade laboral Premio dun posto de traballo fixo e varios temporais no II Concurso de Telemárketing de Coaxis

Confederación Intersindical Galega www.galizacig.com ÚLTIMA REVISIÓN: 03/11/2006 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta