Actualidade Vigo, 19 de decembro de 2006 O mércores 20, na Casa Sindical, CIG, CCOO e UGT informarán dos pasos dados para afrontar a problemática do sector Asemblea de traballadores/as da Pedra en O Porriño   CIG-Comunicación- cig.prensa@galizacig.com   As xestións realizadas pola CIG deron como froito que aos traballadores/as das canteiras de Galiza se lles apliquen coeficientes redutores na idade de xubilación. No sector de transformación (talleres de corte, labrado, pulido e colocación) este dereito é denegado pola Administración estatal –máis empeñada en alongar a idade de xubilación que en reducila, con estrañas complicidades sociais– aínda que foi recoñecido nalgún caso polo Tribunal Superior de Xustiza de Galiza.   Os sindicatos CIG, CCOO e UGT convocan a todos os traballadores/as da Pedra a unha Asemblea que terá lugar o vindeiro mércores 20 de decembro ás 19:30 horas na Casa Sindical de O Porriño. O motivo desta Asemblea é o de informar dos pasos dados para afrontar a problemática do sector, fundamentalmente no que atinxe ás condicións de seguridade e enfermidades profesionais e á reordenación da Negociación Colectiva, e estudar próximas mobilizacións. Este sector, con unha gravidade contrastada nas canteiras, sofre unhas condicións laborais penosas, postas de manifesto en todos os estudos epidemiolóxicos e de condicións de traballo realizados, que se reflicten nunha alta porcentaxe de afeccións graves como a silicose ou a xordeira. Desde a CIG, en concreto desde a Federación da Construción, lévase tempo reivindicando a adopción de medidas específicas para poñer freo á situación. As xestións realizadas pola central sindical deron como froito que aos traballadores/as das canteiras de Galiza se lles apliquen coeficientes redutores na idade de xubilación. No sector de transformación (talleres de corte, labrado, pulido e colocación) este dereito é denegado pola Administración estatal –máis empeñada en alongar a idade de xubilación que en reducila, con estrañas complicidades sociais– aínda que foi recoñecido nalgún caso polo Tribunal Superior de Xustiza de Galiza. Na actualidade estase pendente doutras setenta sentencias na provincia de Pontevedra. Os últimos estudos revelan o alto índice do sílice do granito e as difíciles condicións de traballo, polo que é preciso que estes coeficientes sexan revisados para lograr acurtar máis a exposición dos traballadores aos perigos inherentes á actividade. Neste sentido a CIG solicitou no mes de maio a equiparación dos coeficientes redutores aos das categorías de interior da minería do carbón, para posibilitar xubilacións a partires dos 55 anos, e que se inclúan na mesma aos traballadores das empresas transformadoras. Esta mesma petición foi reiterada en novembro polos tres sindicatos con representatividade no sector (CIG, CCOO e UGT) e respaldada pola Asociación de Canteiros de Galiza, a organización empresarial máis representativa. Por outra parte, nunha reunión recente entre sindicatos e patronal acordouse impulsar un único convenio colectivo para o sector da Pedra en Galiza. As reivindicacións do sector e que os sindicatos ten presentado ante as administracións e a patronal pódense resumir na seguinte enumeración. Un Plan Estratéxico para o sector da Pedra en Galiza que inclúa: Coberturas económicas e indemnizacións xustas para os afectados por enfermidades profesionais, favorecendo as xubilacións anticipadas e dotando os fondos necesarios para paliar a situación de aqueles que, por circunstancias de idade, non poidan acceder á mesma. Recoñecemento de pensións para os afectados por silicose de primeiro grao. En paralelo, elaboración dun Plan de Empregos Alternativos. Redución da idade de xubilación modificando os actuais coeficientes redutores coa súa equiparación ás categorías do interior da minería do carbón e coa extensión destes dereitos aos traballadores das industrias de transformación. Plan específico de Seguridade e Saúde. Convenio Galego do Sector da Pedra. Os sindicatos tamén están a exixir que se depuren as responsabilidades que teñen as mutuas, xa que resulta inaudito que fosen incapaces de detectar as afeccións dos traballadores do sector, a pesar de que é obriga das mesmas realizar os recoñecementos médicos axeitados ás características de cada posto de traballo. Para respaldar estas reivindicacións, a Asemblea decidirá unha campaña de mobilizacións, que desde a CIG consideran deben ser inmediatas, masivas e continuadas para exixir que, coa urxencia que o caso require, se apliquen as medidas solicitadas e deste xeito se poña fin a unha situación de inxustiza e discriminación manifesta. Neste sentido, chamarán ao conxunto de organizacións políticas, sociais e institucións dos concellos con maior incidencia desta actividade a somarse ás mesmas, para corrixir unha situación que transcende ao ámbito laboral, converténdose nun problema social de considerábel incidencia.

Informacións relacionadas 28/11/2006 Xosé Xoán Melón anunciou unha campaña de denuncia da precaria situación dos traballadores da industria da pedra en Galiza Próximas mobilizacións nas canteiras de O Porriño Entrevista ao xefe da unidade de Medicina do Traballo do Centro de Seguridade e Saúde Laboral de Rande Manuel Gil Fernández fala sobre a enfermidade profesional da silicose 24/11/2006 A Federación de Construción da CIG organiza unha xornada de Prevención na Industria da Pedra 27/10/2006 Acudirán á xuntanza Antón Louro, Ana Pastor e Olaia Fernández A Federación da Construción reúnese cos portavoces galegos no Congreso para tratar a cuestión da silicose

Confederación Intersindical Galega www.galizacig.com ÚLTIMA REVISIÓN: 19/12/2006 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta