Actualidade Vigo, 1 de decembro de 2006 XII Congreso da CGTP do Perú: Organización interna, representación política e alianzas internacionais   CIG-Comunicación- cig.prensa@galizacig.com   O Congreso recoñeceu as dificultades que teñen as organizacións políticas de esquerda para facerse un oco na vida política peruana. Considerou que a fragmentación partidaria e a dura represión da década fujimorista deixaron á clase traballadora sen portavoces nas instancias parlamentares e de poder. Para paliar isto, o Congreso aprobou unha proposta para situar á CGTP no centro dunha iniciativa de construción dun “Partido dos Traballadores” que, tomando o exemplo do PT do Brasil, poda levar aos traballadores peruanos a gobernar o País. (Foto: Delegacións internacionais asistentes ao XII congreso da CGTP-Perú. ©galizacig.com).   Cerca de 500 delegados e delegadas participaron en Lima no XII Congreso ordinario da Central Xeral de Traballadores do Perú (CGTP), a maior central obreira peruana e unha das máis importantes confederacións de América Latina. A CIG asistiu como convidada xunto con confederacións sindicais de Arxentina, Colombia, Estado español, Francia, Italia, Panamá e Uruguai. Estivo tamén presente a Federación Sindical Mundial. O sindicalismo peruano está moi fragmentado en canto a centrais sindicais formalmente constituídas pero a CGTP agrupa a máis do 90% dos traballadores e traballadoras sindicados. Con todo, tamén a CGTP sufriu as consecuencias da década de goberno de Fujimori que puxo en práctica unha das metas dos gobernos neoliberais en latinoamérica: o debilitamento sindical e, a poder ser, a súa total desaparición. Desde hai dous anos a CGTP está inmersa nun proceso de reorganización que é común a bastantes centrais sudamericanas, consistente en crear sindicatos de rama que agrupen aos innumerábeis sindicatos de empresa existentes. O congreso constatou a lentitude e dificultade da reorganización pois supón tamén un cambio drástico de mentalidade nun sindicalismo que se organizou historicamente tomando como referencia única o centro de traballo. Obxectivo final deste proceso é a conversión da CGTP nunha central con 15 estruturas sectoriais que agrupen á totalidade dos máis de 100 sindicatos que a compoñen. O Congreso recoñeceu as dificultades que teñen as organizacións políticas de esquerda para facerse un oco na vida política peruana. Considerou que a fragmentación partidaria e a dura represión da década fujimorista deixaron á clase traballadora sen portavoces nas instancias parlamentares e de poder. Para paliar isto, o Congreso aprobou unha proposta para situar á CGTP no centro dunha iniciativa de construción dun “Partido dos Traballadores” que, tomando o exemplo do PT do Brasil, poda levar aos traballadores peruanos a gobernar o País. Por último, a CGTP decidiu non mudar a súa afiliación internacional na Federación Sindical Mundial, simultaneándoa coa participación propositiva nos foros internacionais nos que se discute e decide sobre os dereitos dos traballadores.

Confederación Intersindical Galega www.galizacig.com ÚLTIMA REVISIÓN: 01/12/2006 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta